歌 林 多 前 書

1 2 3 4 5 6 7 8 9 10 11 12 13 14 15 16

11:1 恁著學我,親像我學基督。
11:2 我謳咾恁,因為恁凡代誌紀念我,閣執守諸個遺傳,照我所傳互恁的。
11:3 總是我愛恁知基督是做查甫人的頭;查甫人做婦仁人的頭;上帝做基督的頭。
11:4 見若查甫人祈禱抑是傳道,若罩(tà)頭殼,就凌辱伊的頭。
11:5 若是見若婦仁人祈禱抑是傳道,無罩(tà)頭殼,就凌辱伊的頭,因為這及剃頭毛無各樣。
11:6 婦仁人若無罩頭殼,就著剪頭毛;婦仁人剪頭毛抑剃頭毛若是見誚,就卡好著罩頭
11:7 查甫人呣應該罩頭,因為伊是上帝的像及榮光;若是婦仁人就是查甫人的榮光。
11:8 因為查甫人呣是對婦仁人出,獨獨婦仁人是對查甫人出;
11:9 因為查甫人呣是為著婦仁人才創造,是婦仁人為著查甫人來創造。
11:10 所以,婦仁人著有降服權柄的記號佇伊的頭殼,為著使者的緣故。
11:11 總是佇主若無查甫人,就呣成婦仁人,無婦仁人,就呣成查甫人。
11:12 因為親像婦仁人對查甫人出,查甫人也是對婦仁人才有;獨獨萬項是對上帝出。
11:13 恁心內家己省察,婦仁人無罩頭殼來祈禱上帝,是合適(ha̍p-sek)嗎?
11:14 對本性豈呣知,查甫人有長的頭毛,是做見誚嗎?
11:15 若是婦仁人有長的頭毛,是做伊的榮光,因為伊的頭毛是賞賜伊做帕(phè)。
11:16 設使有想愛欲辯駁的,阮無此號例,上帝諸個教會也無。
11:17 今我將此個吩咐恁,呣是謳咾恁;就是恁聚集無致到利益,是致到損害。
11:18 頭一項,我聽見恁聚集做會的時,恁中間有分黨,我也大略信。
11:19 因為恁中間免得有黨派,欲互真實的人顯明佇恁中間。
11:20 按呢恁聚集佇一所在,呣是食主的晚餐;
11:21 因為食的時,逐人做伊代先食伊的下昏頓(ê-hng tǹg),有人枵,有人醉。
11:22 恁豈無厝通飲食嗎?抑是恁看輕上帝的教會,也互無的見誚啊?我欲對恁怎樣講?佇此個我欲謳咾恁嗎?我無謳咾!
11:23 因為我對主受,也曾傳互恁的,就是主耶穌互人賣彼暝,有提餅,
11:24 祝謝,來擘伊,講:「此個是我的身軀,為著恁拍破的,恁著行按呢來紀念我。」
11:25 食了後,也按呢捧杯,講:「此個杯就是新約,佇我的血設立的,見若飲的時,著行按呢來紀念我。」
11:26 因為恁逐擺食此個餅,飲此個杯,是表明主的死,直到伊閣來。
11:27 按呢,凡若食主的餅,抑是飲主的杯無合宜的,是辜負主的身軀及血。
11:28 若是人著家己省察,才通食此個餅、飲此個杯。
11:29 人無分別主的身軀,來飲食,就是對飲食家己取審判。
11:30 所以恁中間衰膦(soe-lám)的、破病的多多,死的也無少。
11:31 咱若家己審問,就無受審判。
11:32 總是咱受審判,是互主所警戒,免得及世間人同受定罪。
11:33 我的兄弟啊,所以恁聚集欲食的時,著相聽候。
11:34 若有人枵,著t厝食,免得聚集,致到受審判。其餘的,等我來才欲設法。

回聖經目錄