歌 林 多 前 書

1 2 3 4 5 6 7 8 9 10 11 12 13 14 15 16

12:1 兄弟啊,論到神的賞賜,我呣愛恁呣知。
12:2 恁知恁做外邦人的時,受迷惑去就近講話的偶像,出在伊引誘。
12:3 所以我互恁知,互上帝的神感動來講的,無人講「耶穌是通咒詛」;若呣是互聖神感動的,也無人會講「耶穌是主」。
12:4 今恩賜有分別,若是神是像一個。
12:5 職份有分別,若是主是像一個。
12:6 功用有分別,若是上帝像一個,施行萬事佇眾人中的。
12:7 若是聖神的顯明是賞賜逐人,欲利益眾人。
12:8 因為有的對神用智慧的話互伊,有的照此個神用知識的話互伊,
12:9 閣有人佇此個神用信互伊,有的佇此個神用醫病的恩賜互伊,
12:10 有的互伊會行各樣的權能,有的互伊做先知,有的互伊會分別諸個神,閣有的互伊會講逐樣的音語,有的互伊會翻譯逐樣的音語。
12:11 諸個攏是像一個神所施行的、照伊所愛的隨樣(sûi-iūⁿ分互逐人。
12:12 因為親像身軀是一個,也有多多體;閣身軀的體雖然多,攏是一個身軀;基督也是按呢。
12:13 因為咱眾人無論是猶太,抑是希利尼,做奴才的,抑是自由的,攏曾受洗禮佇一個神,來屬佇一個身軀,也攏總曾飲一個神。
12:14 因為身軀呣是一體,是多多體。
12:15 設使腳若講:「我因為呣是手,我無屬身軀;」伊呣是為著按呢就無屬佇身軀。
12:16 設使耳仔若講:「我因為呣是目睭,我無屬佇身軀;」伊呣是為著按呢就無屬佇身軀。
12:17 設使通身軀是目睭,對叨落會聽?若攏是耳仔,對叨落會鼻?
12:18 若是上帝照伊的所愛,將諸個體隨個安排佇身軀。
12:19 若百體攏像(siāng)一款,就身軀佇叨落?
12:20 總是今體是多多,也身軀是一個。
12:21 目睭會對手講:「我無欠用你;」頭殼也會對腳講:「我無欠用恁。」
12:22 呣若按呢,身軀諸個體看做卡軟茈的,閣卡無得。
12:23 閣咱看做身軀卡無貴氣的體,咱就妝飾互卡尊貴;也卡無文雅的,咱互閣卡文雅。
12:24 因為咱文雅的體,無所欠缺;獨獨上帝調和身軀,佇有欠缺的益發互(it-hoat)伊尊貴,
12:25 免得身軀無相合,是欲互百體平平相眷顧。
12:26 若一體受苦,百體同受苦;一體受榮光,百體同快樂。
12:27 恁諸個是基督的身軀,隨個是做體。
12:28 上帝所設佇教會的:一是使徒,二是先知,三是教師,閣有行權能的,閣有醫病的恩賜,幫助的,治理的,講逐樣的音語的。
12:29 眾人豈攏是使徒嗎?攏是先知嗎?攏是教師嗎?攏行權能嗎?
12:30 攏有醫病的恩賜嗎?攏會講逐樣的音語嗎?攏會翻譯嗎?
12:31 恁著切切欣慕許個卡大的恩賜。我用第一好的路續指示恁。

回聖經目錄