歌 林 多 前 書

1 2 3 4 5 6 7 8 9 10 11 12 13 14 15 16

14:1 著求仁愛,也著切切欣慕屬佇神的恩賜,卡要緊的,是做先知來傳道。
14:2 因為講各樣的音語的,呣是及人講,是及上帝講,因為無人會曉聽。總是,伊有啲講屬神的奧妙。
14:3 獨獨做先知來傳道的,是及人講,來建立、來勸勉、來安慰。
14:4 講音語的,是建立家己;做先知傳道的,是建立教會。
14:5 我愛得恁攏會講音語,獨獨閣卡愛是恁做先知來傳道;因為講音語的,若無翻譯,互教會得著建立,就做先知來傳道的,比伊卡大。
14:6 今兄弟啊,我到恁遐,若清清講音語,也無用啟示,抑是知識,抑是做先知來傳道,抑是用教示的話,來給恁講,有甚麼利益恁?
14:7 彼號無活氣的物啲出聲,親像簫,親像琴,若無分別伊的音,豈會知所歕所彈的是甚麼啊?
14:8 若是哨角出無定著的音,是誰會備辦交戰啊?
14:9 恁也是按呢。若無用舌講快明的話,豈會(thái- ōe)知所講的啊,恁所講的互風飛去。
14:10 世上的音語,不論偌多樣,無一個無意思。
14:11 我若呣識彼個聲的意義,就講的人欲掠我做番,我也欲掠伊做番。
14:12 按呢恁既然切切欣慕屬佇神的恩賜,著求互恁充滿來建立教會。
14:13 所以講音語的,著求會翻譯。
14:14 我若用音語祈禱,我的神有啲祈禱,若是我的心思無所利益。
14:15 按呢是怎樣?我欲用神祈禱,也欲用心思祈禱;我欲用神吟詩,也欲用心思吟詩。
14:16 若無,就恁用神祝謝,彼號平常人既然呣知你講甚麼,伊豈會當你感謝的時來講「阿們」?
14:17 你的感謝是好,若是別人無得著建立。
14:18 我感謝上帝,我講音語比恁眾人卡多。
14:19 總是佇教會中,我愛用心思講五句通教示人的話,贏過講萬句的音語。
14:20 兄弟啊,論智慧莫得做囝仔。論歹著做嬰仔,論智慧著做大人。
14:21 佇律法有記載:主講:我欲用別樣音語的人及別樣人的嘴唇給此國的百姓講;按呢猶原呣聽我。
14:22 所以,音語做兆頭呣是為著信的人,是為著呣信的人;做先知來傳道呣是為著呣信的人,是為著信的人。
14:23 設使全教會聚集佇一所在,若攏講音語,有平常人,抑是呣信的入來,豈無欲講恁啲(siáu)嗎?
14:24 設使攏做先知來傳道,有一個呣信的,抑是平常人入來,伊就互眾人叫醒,互眾人擬斷,
14:25 伊心內所隱密的露現,就仆落去,拜上帝,講:「上帝真正佇恁中間。」
14:26 兄弟啊,按呢是怎樣?恁聚集的時,逐人有詩歌的,有教示的,有啟示的,有音語的,有翻譯的。逐項事著行來致到建立。
14:27 若有講音語的,只堪得二個,上多三個,也著照次序,閣著一人翻譯。
14:28 若無人通翻譯,就佇教會中伊著靜靜,獨獨對本身及對上帝講。
14:29 做先知來傳道的,也只堪二個抑三個來講,其餘的著分別伊。
14:30 若邊頭坐的有人得著啟示,彼個代先講的著靜靜。
14:31 因為恁一人一人攏會通做先知來傳道,互眾人通學習,互眾人通受苦勸。
14:32 閣先知的神是順服佇先知;
14:33 因為上帝呣是紛亂的,是和平的,親像佇聖徒攏總的教會一樣。
14:34 婦仁人佇教會中著靜靜,因為呣准講。就是著順服,親像律法也是按呢講。
14:35 若愛學習甚麼,著佇家內問家己的丈夫,因為婦仁人佇教會中來講是見誚。
14:36 上帝的道理豈是對恁出?抑是干單傳互恁啊?
14:37 若有人家己掠做先知,抑是做屬佇神的人,就著知,我所寫互恁的是主的命令。
14:38 若有人呣知,就據在伊呣知!
14:39 所以,我的兄弟啊,著切切欣慕做先知來傳道,也莫得禁止講音語。
14:40 凡事著文雅也照規矩來行。