歌 林 多 前 書

1 2 3 4 5 6 7 8 9 10 11 12 13 14 15 16

9:1 我豈得自由嗎?豈呣是使徒嗎?豈呣曾看見咱的主耶穌嗎?恁豈呣是我佇主做成的工嗎?
9:2 設使對佇別人,我呣是使徒,對佇恁我無呣是,因為恁佇主就是我做使徒的印證。
9:3 有查問我的,我就用此個家己分訴:
9:4 阮豈無權通飲通食嗎?
9:5 阮豈無權通娶信主的姊妹做某,來及阮相及行,親像其餘的使徒及主的兄弟及磯法嗎?
9:6 抑是干單我及巴拿巴無權通免做工嗎?
9:7 甚麼人當兵來食家己的糧嗎?甚麼人栽葡萄園無食伊的果子嗎?甚麼人飼精牲,無食彼陣的奶嗎?
9:8 我講諸個,豈是照人的意見嗎?抑是律法無按呢講嗎?
9:9 因為佇摩西的律法有記載講:「磨五穀的牛,莫得籠(láng)伊的嘴」。上帝豈是致意佇牛嗎?
9:10 抑是一概為著咱來講伊?真正是為著咱來寫。因為犁園的著存向望來犁;磨五穀的著向望相及有份來磨。
9:11 阮若將屬佇神的物撒(iā)佇恁中間,就對恁收成屬佇肉體的物,豈是過頭嗎?
9:12 別人對佇恁尚且有份此個權柄,何況阮嗎?總是阮呣曾用此個權,反轉吞愞逐項的事,免得阮有甚麼阻擋基督的福音。
9:13 豈呣知著磨佇聖的事的食殿內的物?跟隨祭壇的及祭壇相及分物嗎?
9:14 親像按呢,主設法互傳福音的人著對福音來度活。
9:15 若是諸個事我攏未曾用。閣我寫諸個,呣是愛人按呢款待我,因為我寧可死不致人互我所誇口的歸佇空空。
9:16 我傳福音呣是通誇口的事,是不得已若定。因為若無傳福音,我就有災禍。
9:17 我若甘心做此個事,就有報賞;就若呣甘心,有職任已經交代我啦。
9:18 按呢,我的報賞是甚麼啊?就是我啲傳福音互人免所費也會得著福音,免得我佇福音所有的權用到盡。
9:19 我對佇眾人雖罔是自由,猶久將家己做眾人的奴僕,為著欲得著人愈多(ná-chōa)。
9:20 猶太人,我就親像猶太人,欲得著猶太人;向法下(ē)的人,我雖然本身無屬佇法下,就親像法下的人,欲得著法下的人。
9:21 向法外的人,我就親像法外人,欲得著法外的人;其實我呣是佇上帝的法外,就是佇基督的法內。
9:22 向軟弱的人,我就成做軟弱,欲得著軟弱的人。向逐號人,我成做逐號款,一概是欲救人。
9:23 逐項事,我因為福音來行,是互我通相及有份佇福音。
9:24 豈呣知在場鬥走的逐個攏走,若是得著報賞的只有一個?恁著按呢走,才通得著。
9:25 見若鬥力的,逐項事撙節(chún-chat),是欲得著會敗壞的冕旒;若是咱是欲得著敗壞的。
9:26 所以,我按呢啲走呣是親像無定著的方向;我拍拳無親像啲拍空氣。
9:27 我拍我的身軀到殄殄(thiám-thiám),互伊降服,驚了我已經傳互別人,本身豈採抵著拒絕。

回聖經目錄