帖 撒 羅 尼 迦 前 書

1 2 3 4 5

1:1 保羅、及西拉,以及提摩太批寄互帖撒羅尼迦人的教會,就是佇父上帝及主耶穌基督的。願恁得著恩典、平安!
1:2 阮為著恁眾人常常感謝上帝,佇祈禱的中間數念恁,
1:3 佇上帝咱的父的面前,長長數念恁有信就行做,有仁愛就著磨,有向望咱的主耶穌基督就吞愞。
1:4 上帝所疼的兄弟啊,阮知恁的受揀選;
1:5 因為阮的福音到佇恁,呣是在佇講話若定,是在佇權能在佇聖神,及堅固的信,親像恁知阮佇恁中間,為著恁來成做甚麼等號的人。
1:6 閣恁已經佇多多苦難,用聖神所賞賜的歡喜,來承受道理,就學阮也學主;
1:7 致到恁做馬其頓亞該亞攏總信的人的模樣。
1:8 因為主的道理對恁傳出。呣若佇馬其頓亞該亞若定,就是恁向上帝的信已經逐所在報揚;致到阮呣免講甚麼。
1:9 家己報明講阮到恁中間是甚麼款,也恁怎樣有離開偶像,歸佇上帝,來服事活閣真的上帝,
1:10 也聽候伊的子對天落來,就是伊對死人中互伊復活的耶穌──是彼個拯救咱出將來的受氣者。