約 翰 二 書

1

1:1 做長老的批寄互受揀選尊貴的婦仁人及伊的子兒,是我佇真理所疼的;閣呣若我,見若識真理的亦攏是按呢。
1:2 疼恁是為著真理,此個真理就是佇咱的,也欲永遠及咱佇啲。
1:3 恩典、憐憫、平安對父上帝,也對父的子耶穌基督佇真理及疼痛欲及咱佇啲!
1:4 我真歡喜,因為抵著你的子兒有佇真理來行的,照咱對父領受的命令。
1:5 尊貴的婦仁人啊,今我求你,呣是親像寫新的命令互你,是咱對起頭所有的,就是大家著相疼。
1:6 咱照伊的命令來行,這就是疼。恁趁伊來行照恁對起頭所聽見的,這就是彼個命令。
1:7 因為有多多迷惑人的出來入世間,就是呣認耶穌基督佇肉體來的;此個就是彼個迷惑人的、也是對敵基督的。
1:8 恁著謹慎家己,免得恁失落咱所著磨的,通得著滿足的報賞。
1:9 見若進前也無佇基督的教示的,無有上帝;佇彼個教示的,就有父及子。
1:10 若有人到恁遐,也無傳此個教示,就呣通接納伊入厝,也呣通給伊請安;
1:11 因為給伊請安的,有份佇伊的歹所行。
1:12 我有多多項欲寫互恁,呣愛用紙及墨,是向望到恁遐,當面相及講,互恁的歡喜充滿。
1:13 你受揀的姊妹的子兒攏給你請安。