列 王 記 下

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25

1:1 亞哈死了,摩押背叛(pōe-poān)以色列
1:2 亞哈謝撒瑪利亞的樓頂的欄杆跋落來,致病;就差使者給講:「恁去問以革倫的上帝巴力西卜,我此個病會好抑。」
1:3 總是耶和華的使者給提斯比以利亞講:「你起來,上去接撒瑪利亞王的使者,給講:『恁去問以革倫的上帝巴力西卜,是因為以色列中無上帝嗎?』
1:4 所以耶和華按呢講:『你會閣落去你所上去的眠床,的確會死!』」以利亞就去。
1:5 使者倒來見王,王問講:「恁為甚麼倒來?」
1:6 使者應伊講:「有一人抵著阮,給阮講:『去啊,恁倒去見差恁的王,給伊講:耶和華按呢講,你差人去問以革倫的上帝巴力西卜,是因為以色列中無上帝嗎?所以你閣落去你所上去的眠床,的確會死!』」
1:7 王問講:「上來抵著恁,給恁講諸個話的,伊的形狀啥款?」
1:8 應講:「伊穿有毛的衫,腰縖皮帶。」王講:「這是提斯比以利亞。」
1:9 王就差五十夫長導伊彼五十人去以利亞遐,伊上去伊遐;看啊,以利亞坐佇山頂。五十夫長給伊講:「上帝的奴僕啊,王講,你著落來!」
1:10 以利亞應五十夫長講:「我若是上帝的奴僕,願火對天落來,燒你及你彼五十人!」就有火對天落來燒伊及伊彼五十人。
1:11 王閣差一個五十夫長,導伊彼五十人去以利亞遐。伊就給伊講:「上帝的奴僕啊,王講,你緊緊落來!」
1:12 以利亞講:「我若是上帝的奴僕,願火對天落來,燒你及你彼五十人!」就有上帝的火對天落來,燒伊及伊彼五十人。
1:13 王閣差第三隊的五十夫長,導伊彼五十人。彼個第三隊的五十夫長上去,跪佇以利亞的面前,懇求伊講:「上帝的奴僕啊,求你掠我的生命及你此五十個奴僕的生命做寶貝!
1:14 看啊,已經有火對天落來燒死以前二個五十夫長及伊逐個五十人;今求你看我的生命做寶貝!」。
1:15 耶和華的使者給以利亞講:「你及伊落去,呣免驚伊!」以利亞就起來,及伊落去見王,
1:16 給伊講:「耶和華按呢講:『你差人去問以革倫的上帝巴力西卜,是因為以色列中無上帝互你問伊的話嗎?所以你閣落來你所上去的眠床,的確著死!』」
1:17 王就死,照以利亞所傳耶和華的話。王無子,耶和南續接位,佇猶大約沙法的子耶和南第二年。
1:18 亞哈謝其餘的事豈無記佇以色列諸個王的記錄嗎?