列 王 記 下

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25

11:1 亞哈謝的老母亞她利雅看見伊的子已經死,就起來剿滅一盡的王親。
11:2 總是約蘭王的查某子,亞哈謝的姊妹約示巴,將亞哈謝的子約阿施對許個受刣的王子中偷抱出來,將伊及伊的奶母囥佇睏房裡,亞她利雅蓋密伊,互伊無受刣。
11:3 後來及伊相及囥佇耶和華的殿歷過六年久;亞她利雅管理彼個地方。
11:4 到第七年,耶何耶大差人叫迦利族及護衛兵的百總,導入耶和華的殿到伊遐,就及立約,互佇耶和華的殿咒誓,閣用王的子互看,
11:5 閣吩咐講:「恁著按呢行:見若恁佇安息日入來的三份一著顧守王宮,
11:6 三份一著佇蘇珥的門,三份一著佇護衛兵後面的門。按呢顧守王宮,阻止人出入。
11:7 見若恁佇安息日出去的二份著顧守耶和華的殿佇王的四圍;
11:8 恁逐人手攑家私,四圍保護王。見若人入恁的班列的著互伊死,王出王入的時,恁著跟隨伊。」
11:9 許個百總照祭司耶何耶大一切所命令的去行,逐人帶輪著安息日入來的人及輪著安息日出去的人來到祭司耶何耶大遐。
11:10 祭司就將耶和華殿內所囥大衛王的槍及屏牌交互許個百總。
11:11 護衛兵手裡攑家私,佇壇及殿遐,對殿的正旁到殿的倒旁,徛佇王的四圍。
11:12 祭司導王的子出來,給伊戴冕旒,將律法的冊互伊,用油抹伊設立伊做王;就拍手掌講:「願王萬歲!」
11:13 亞她利雅聽見護衛兵及百姓的聲,就到百姓遐,入耶和華的殿,
11:14 看見王照例徛佇柱邊,軍長及歕號頭的徛佇王的左右,國內眾百姓歡喜歕號頭;亞她利雅就拆裂伊的衫,喝講:「反叛啊!反叛(hoán-poān)啊!」
11:15 祭司耶何耶大吩咐管轄軍隊的百總,對講:「對班列的中間趕伊出去,見若隨伊的著用刀刣死伊!」因為祭司講「呣通佇耶和華的殿死伊。」
11:16 閃開雙旁互伊去;伊對上到王宮的馬路去,佇遐受刣。
11:17 耶何耶大就佇耶和華及王及百姓的中間立約,互做耶和華的百姓;閣佇王及百姓的中間立約。
11:18 對按呢國內的眾百姓到巴力的廟,拆毀伊,拍碎許個壇及偶像,閣佇壇前拍死巴力的祭司瑪坦。祭司設官員來顧守耶和華的殿,
11:19 閣導百總及迦利族及護衛兵,以及國內眾百姓,對耶和華的殿導王落來,對護衛兵的門路入王宮,伊就坐王位。
11:20 國內的百姓攏歡喜,通城攏安靜。佇王宮遐用刀刣死亞她利雅
11:21 約阿施坐位的時七歲。


回聖經目錄