列 王 記 下

2:1	耶和華欲用捲螺風接以利亞上天的時，以利亞及以利沙對吉甲去。
2:2	以利亞給以利沙講：「你且踮遮，因為耶和華差我去伯特利。」以利沙講：「我指永活的耶和華，及你的活命來咒誓，我無欲離開你。」二人就落去伯特利。
2:3	佇伯特利許個先知的學生出來見以利沙，給伊講：「耶和華今仔日欲取你的老師離開你去，你知嗎？」伊講：「是，我知，恁莫做聲。」
2:4	以利亞給伊講：「以利沙啊，你且踮遮，因為耶和華差我去耶利哥。」伊講：「我指永活的耶和華，及你的活命來咒誓，我無欲離開你。」就到耶利哥。
2:5	佇耶利哥許個先知的學生就近以利沙，給伊講：「耶和華今仔日欲取你的老師離開你去，你知嗎？」伊講：「是，我知，恁莫做聲。」
2:6	以利亞給以利沙講：「你且踮遮，因為耶和華差我去約但。」以利沙講：「我指永活的耶和華，及你的活命來咒誓，我無欲離開你。」二人就相及去。
2:7	有先知的學生五十人去，遠遠徛佇的對面；二人佇約但河邊啲徛。
2:8	以利亞提伊的外衫捲起來，拍許個水，水就分雙旁，二人行乾地過去。
2:9	過去了，以利亞給以利沙講：「我猶未受取離開你去，我欲給你做甚麼？你今著求。」以利沙講：「求你將感動你的神互我雙份。」
2:10	以利亞講：「你所求的(oh)得啊！總是我受取離開你的時，你若看見我，就欲得著，若無，就得著。」
2:11	啲行啲講，忽然有火車火馬隔開二人，以利亞就坐捲螺風上天。
2:12	以利沙看見，就叫講：「我的父啊！我的父啊！以色列的戰車及伊馬兵啊！」後來無閣看見伊。就提家己的衫來拆做二旁。
2:13	伊拾以利亞磕落(ka-la̍uh)落來(lo̍h-lâi)的外衫，倒轉去徛佇約但河邊。
2:14	伊用以利亞磕落落來的外衫拍水，講：「以利亞的上帝──耶和華佇叨落？」拍水了後，水就分雙旁，以利沙就過去。
2:15	先知的學生踮佇耶利哥佇伊的對面的，看見伊就講：「感動以利亞的神踮佇以利沙啦。」就來迎接伊，仆落佇伊的面前，
2:16	給伊講：「你看啊，你的奴僕遮有壯士五十人，求你准去尋你的老師，驚了耶和華的神提伊，佇某個山某個山谷，」伊講：「呣通差。」
2:17	迫伊到互伊歹推(pháiⁿ-ē)，伊就講：「恁通差伊。」就差五十人去，尋三日，也尋無。
2:18	伊佇耶利哥聽候倒來到伊遐；伊給講：「我豈無給恁講，呣通去嗎？」
2:19	城內的百姓給以利沙講：「請你看此個城的地點是好，照我的主所看見的；總是水歹，致到土地無出產。」
2:20	以利沙講：「恁提一個新的瓶(pân)，貯鹽來互我。」就提來互伊。
2:21	伊出去到水泉，將鹽傾佇彼內面，講：耶和華按呢講：『我醫好此個水，無閣對遐有死無，抑是無出產。』」
2:22	彼個水就醫好，到今仔日，照以利沙所講的話。
2:23	以利沙對遐上去伯特利，上路的時，有囝仔(gín-ná)對城內出來，恥笑伊，對伊講：「翏額的(liù-hia̍h-ê)上去噢！翏額的(liù-hia̍h-ê)上去噢(o͘h)！」
2:24	伊越頭看，就奉耶和華的名咒詛。就有二隻(chiah)熊母(hîm-bú)對樹林內出來，擘拆(peh-thiah)中間四十二個囝仔。
2:25	伊對遐上迦密山，閣對遐倒去撒瑪利亞。