列 王 記 下

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25

23:1 王差人聚集猶大耶路撒冷的眾長老。
23:2 王就上去耶和華的殿,猶大眾人及徛起耶路撒冷的百姓,及祭司、先知,及眾百姓,無論大細,攏及伊去;王就將耶和華殿內偶然得著約的冊一切的話讀互聽。
23:3 王徛佇柱邊,佇耶和華的面前立約,欲盡心盡性順趁耶和華,守伊的誡命、及干證的話、及律例,來成此本冊所記立約的話。百姓攏承認此個約。
23:4 王命令祭司頭希勒家及第二級的祭司,及顧門的官,將為著巴力亞舍拉,及天頂的萬象所造許個器具,搬出耶和華的殿,燒伊佇耶路撒冷汲淪溪邊的田,帶伊的火灰到伯特利
23:5 猶大列王所設立拜偶像的祭司,佇猶大許個城及耶路撒冷四圍的山頭壇燒香的,今王攏(lut)伊,也(lut)許個燒香佇巴力及日、月、行星,以及天頂的萬象的;
23:6 伊閣帶亞舍拉出耶和華的殿去耶路撒冷外,到汲淪溪(Khip-lûn-khoe)佇汲淪溪燒伊,搥(tûi)伊做粉,用彼個粉撒佇百姓的墓;
23:7 閣毀耶和華殿內孌童(loân-tông)的厝,就是婦女為著亞舍拉織布棚的所在。
23:8 閣對猶大許個城帶許個祭司出去,拍垃墋祭司燒香的山頭壇,對迦巴別是巴,也拆毀許個門的山頭壇,就是佇管城的約書亞的門前,就是人入城門的倒旁。
23:9 總是山頭壇的祭司佇耶路撒冷無上耶和華的壇,只有佇兄弟中食無酵餅。
23:10 伊閣拍垃墋佇便欣嫩陀斐特,免得人佇遐互的子查某子經過火來獻互摩洛
23:11 閣除去猶大列王獻互日頭許個馬,佇入耶和華殿的所在,佇太監拿單米勒倚近兩廊的厝,閣用火燒日頭許個車。
23:12 猶大列王佇亞哈斯的樓頂的厝蓋所起的祭壇及瑪拿西佇耶和華殿二個院中所起的壇,王攏毀壞伊,對彼所在遷徙伊,傾伊的粉佇汲淪溪
23:13 從前以色列王所羅門佇耶路撒冷的頭前、佇邪僻山的正旁所起的山頭壇服事西頓人可惡的亞斯他錄摩押人可惡的基抹亞捫人可惡的米勒公的,王攏拍垃墋伊,
23:14 閣毀壞許個柱像,剉許個亞舍拉,將人的骨頭充滿許個所在。
23:15 伯特利的壇,以及尼八的子耶羅波安以色列犯罪的所起的山頭廟,今約西亞毀彼個壇及山頭廟,閣燒伊的山頭廟,搥伊成粉,續燒彼個亞舍拉
23:16 約西亞越轉身看見山裡許個墓,就差人去提墓內的骨頭,燒佇壇頂,來拍垃墋伊,照耶和華所講,就是前宣傳諸個代誌上帝的奴僕所宣傳的。
23:17 約西亞講:「我所看見的石碑是甚麼?」彼個城的人給伊講:「前有上帝的奴僕對猶大來,代先講你現今所做的事來攻擊伯特利的壇的,此個是伊的墓。」
23:18 伊講:「莫得插伊!人呣通遷徙伊的骨頭。」就無動著伊的骨頭,也無動著對撒瑪利亞來彼個先知的骨頭。
23:19 撒瑪利亞許個城內山頭的厝就是前以色列諸個王所起,來激耶和華的受氣的,今約西亞毀伊,照伊所行佇伯特利的來行佇in;
23:20 閣刣死彼所在山頭廟的祭司佇壇頂,也燒人的骨頭佇壇頂,才倒去耶路撒冷
23:21

王命令眾百姓講:「著守過節來服事耶和華──恁的上帝,照此個約的冊所記的。」

23:22 對士師治理以色列的時及以色列列王、猶大列王的時,實在未有守親像此號的過節;
23:23 只有約西亞王十八年佇耶路撒冷守此個過節服事耶和華。
23:24 猶大地及耶路撒冷所有跳童的、做師公的,及家內的偶像及神佛,及一切可惡的物,約西亞攏除伊,來成律法的話,是記佇祭司希勒家佇耶和華的殿所得著的冊所記的。
23:25 約西亞以前無有王親像伊盡心、盡性、盡力歸向耶和華,照摩西一切的律法;佇伊以後也無出一個王親像伊。
23:26 總是,耶和華無息伊猛烈的大受氣就是伊對猶大發出的受氣,是因為瑪拿西所激著伊受氣許個事。
23:27 耶和華講:「我欲遷徙猶大離開我的面前,親像遷徙以色列一樣;我欲棄拺我所揀此個城──就是耶路撒冷及此間殿就是我指伊來講我的名欲佇遐的。」
23:28 約西亞其餘的事,見伊所行的豈無攏記佇猶大列王的記錄嗎?
23:29 約西亞的年間,埃及王法老尼哥伯拉河攻擊亞述王;約西亞去抵當伊。埃及王抵著約西亞米吉多就刣伊。
23:30 伊的人臣用車載伊的身屍對米吉多帶伊到耶路撒冷,埋葬佇伊本身的墓。國民將約西亞的子約哈斯用油抹伊設立伊做王,續接伊的老父。
23:31 約哈斯坐位的時二十三歲,佇耶路撒冷做王三月日。伊的老母名哈慕她,是立拿耶利米的查某子。
23:32 伊行耶和華所看做歹的事,照伊的列祖一切所行的。
23:33 法老尼哥關禁伊佇哈馬地利比拉,互伊無做王佇耶路撒冷,閣互彼國進貢銀一百他連得,金一他連得。
23:34 法老尼哥設立約西亞的子以利亞敬續接伊的老父約西亞做王,給伊改名叫約雅敬,也帶約哈斯埃及,伊就死佇遐。
23:35 約雅敬用銀及金互法老,照法老的命令對彼地方收銀來互伊,強抽彼地方百姓的金銀,逐人照所派定著的,來互法老尼哥
23:36 約雅敬坐位的時二十五歲,佇耶路撒冷做王共十一年。伊的老母名叫西布大,是魯瑪毗大雅的查某子。
23:37 約雅敬行耶和華所看做歹的事,照伊的列祖一切所行的。


回聖經目錄