撒 母 耳 記 下

1 2 3 4 5 6 7 8 9 10 11 12 13 14 15 16 17 18 19 20 21 22 23 24

13:1 此個以後大衛的子押沙龍有一個真媠的小妹,名叫他瑪大衛的子暗嫩疼伊。
13:2 暗嫩為著伊的小妹他瑪鬱悴到破病。因為伊是在室女,暗嫩家己知得對伊做甚麼代誌。
13:3 暗嫩有一個朋友,名叫約拿達,是大衛的兄示米亞的子。約拿達是真靈竅的人;
13:4 伊對暗嫩講:「王的子啊,你啥事一日一日卡消瘦啊?啥事呣給我講。」暗嫩給伊講:「我疼我的小弟押沙龍的小妹他瑪。」
13:5 約拿達給伊講:「你著倒佇眠床裡假做破病;你的老父來看你,就對伊講:『求你准我的小妹他瑪來我遮,用食物互我,備辦佇我的面前,互我看見,對伊的手接來食。』」
13:6 暗嫩就倒啲假破病。王來覓(bāi)伊,暗嫩就對王講:「求你互我的小妹他瑪來,佇我的面前給我做二塊餅,我通對伊的手接來食伊。」
13:7 大衛就差人到他瑪的厝,給伊講:「今你去你的兄暗嫩的厝,給伊備辦食物。」
13:8 他瑪就到伊的兄暗嫩的厝;暗嫩倒啲。他瑪提麵粉,佇伊的面前摶(chhiau)做餅,閣煏(pek)許個餅,
13:9 就將煎盤傾佇伊的面前,暗嫩呣食,就講:「眾人著離開我出去!」眾人就離開伊,出去。
13:10 暗嫩他瑪講:「你捧(phâng)食物入睏房,我通對你的手接來食。」他瑪就捧所做的餅入睏房,到伊的兄暗嫩遐,
13:11 伊捧去互伊食,伊就搝(khiú)伊,給伊講:「我的小妹啊,你來及我相及睏。」
13:12 伊給伊講:「我的兄,呣通莫得凌辱我。因為佇以色列中呣應該按呢行,你莫得做此個戇事;
13:13 也(iā)我,我欲怎樣洗我的見誚?也你,你佇以色列做戇人的一個。今請你對王講,伊無欲禁止我嫁互你。」
13:14 總是暗嫩呣肯聽伊的話,因為伊比伊卡有力,就凌辱伊,及伊相及睏。
13:15 以後,暗嫩極其怨恨伊,彼個怨恨伊的怨恨比前疼伊的疼閣卡大,暗嫩就給伊講:「起來,去啊!」
13:16 伊給伊講:「呣通按呢!你趕我出去的害著我比你前款待我的卡殄(khah-thiám)!」總是暗嫩呣肯聽伊,
13:17 就叫彼個伺候伊的奴僕,講:「著趕此個查某囝仔對我遮出去!伊出去,門就著閂。」
13:18 彼時他瑪穿彩色的衫,因為王的查某子,猶未出嫁的攏穿此號衫。暗嫩的奴僕就牽伊出去,出去了,門就閂(Koa)啲。
13:19 他瑪摻火灰佇頭殼,拆裂所穿彩色的衫,用手抱頭殼來行,愈行愈哮。
13:20 伊的兄押沙龍問伊講:「你的兄暗嫩曾及你做堆嗎?我的小妹啊,今無做聲,伊是你的兄,莫得掛意此個事。」他瑪就單身踮佇伊的兄押沙龍的厝。
13:21 大衛王聽見諸個事,就不止受氣。
13:22 押沙龍無及暗嫩講好講歹;因為押沙龍怨恨暗嫩,是伊有凌辱伊的小妹他瑪
13:23 過二年,押沙龍佇近以法蓮巴力夏瑣有人給伊剪羊毛;押沙龍請王的眾子攏總去。
13:24 押沙龍來見王,講:「今你的奴僕有用人啲剪羊毛,請王及王的人臣及奴僕相及去。」
13:25 王給押沙龍講:「我的子啊,呣通,阮呣通攏去,驚了你開費(khai-hùi)甚(siuⁿ)傷重。」押沙龍迫伊,總是伊呣去,干單給伊祝福。
13:26 押沙龍講:「若無,就互我的兄暗嫩及阮去。」王講:「啥事著伊及你去啊?」
13:27 押沙龍迫伊,王就允准暗嫩及王的眾子相及去。
13:28 押沙龍吩咐伊的奴僕講:「恁著注意,看暗嫩(Àm-lùn)飲酒得解(tek-kái)的時,我給恁講拍暗嫩,恁就著刣死伊,莫得驚。這豈呣是我吩咐恁的嗎?恁做恁好膽勇敢!」
13:29 押沙龍的奴僕就照押沙龍所吩咐的,來行佇暗嫩。王的眾子攏絔(peh)起來,逐人騎伊的驢,逃走。
13:30 猶佇路裡,有風聲傳到大衛,講:「押沙龍有刣死王的眾子,無留一個。」
13:31 王就起來,拆裂衫,倒佇地裡。王的人臣也拆裂衫,徛佇伊的身邊。
13:32 大衛的兄示米亞的子約拿達應講:「我的主,莫得拍算王的眾子──許個少年人攏互伊刣死,只有暗嫩死若定。因為對暗嫩凌辱伊的小妹他瑪彼日,押沙龍就已經有此個意思。
13:33 今我的主我的王,莫得掛意此個事,拍算王的眾子攏死,其實只有暗嫩死若定。」
13:34 押沙龍就逃走。守望的少年人攑目看,看見多多百姓對伊的後面對山邊的路來。
13:35 約拿達給王講:「看啊,王的眾子攏來啦,果然照你的奴僕所講的。」
13:36 話抵仔講息,王許個子就到,開聲啼哭;王及人臣也攏大啼哭到極。
13:37 押沙龍走到基述亞米忽的子達買遐。大衛日日為著伊的子悲哀。
13:38 押沙龍走到基述,踮遐三年。
13:39 大衛王的心切切數念押沙龍,因為暗嫩已經死,就受安慰。


回聖經目錄