撒 母 耳 記 下

1 2 3 4 5 6 7 8 9 10 11 12 13 14 15 16 17 18 19 20 21 22 23 24

18:1 大衛算隨伊的百姓,設立千總、百總導
18:2 大衛差百姓出去,三份一交約押的手,三份一交洗魯雅的子、約押的兄弟亞比篩的手,三份一交迦特以太的手。王給百姓講:「我的確及恁出去。」
18:3 總是百姓講:「你呣通出去。若阮逃走,對敵無掠阮做要緊;阮若陣亡一半,對敵也無掠阮做要緊。因為你一人擋得阮一萬人,你對城內幫助阮卡好。」
18:4 王給講:「恁所看做好的,我欲行伊。」對按呢王徛佇城門邊,百姓有的一百,有的一千,照次序(chhù-sū)出去。
18:5 王命令約押、亞比篩、以太講:「恁帶著我款待彼個少年人押沙龍著卡寬。」王為著押沙龍命令許個首領的話,百姓攏有聽見。
18:6 百姓就出去田野抵敵以色列人,佇以法蓮的樹林交戰。
18:7 佇遐以色列人刣輸佇大衛許個奴僕的面前;彼日陣亡的真多,共有二萬人。
18:8 因為戰陣散真開,遍遍佇彼所在,樹林所吞滅的比互刀所吞滅的卡多。
18:9 押沙龍偶然抵著大衛的奴僕。押沙龍騎伊的騾,騾走對大欉橡樹艷的樹枝下經過,伊的頭殼掛著橡樹,吊佇半空中,所騎的騾做伊去。
18:10 有一個人看見,就給約押講:「我看見押沙龍掛佇橡樹裡。」
18:11 約押給報伊的人講:「你已經看見,啥事呣對遐拍伊互伊墜落地啊?我就賞你十個銀,及一條帶。」
18:12 彼個人給約押講:「我就得著一千銀佇我的手,也呣敢伸手害王的子;因為阮聽見王命令你及亞比篩以太講:『恁著細膩,呣通害彼個少年人押沙龍。』
18:13 我若濫粉做來害伊的生命,無一項會瞞得王,你就欲徛佇邊仔呣插我。」
18:14 約押講:「我呣通及你延延。」約押手攑三支短槍,彼時押沙龍吊佇橡樹猶活啲,就鑿透伊的心。
18:15 約押攑家私的少年人十個圍押沙龍,拍互伊死。
18:16 約押歕哨角,百姓就倒來,無閣趇(jip)以色列人,因為約押阻止百姓。
18:17 押沙龍佇樹林內一個大深坑,頂面疊一大堆的石頭。以色列眾人逐個走倒去的布棚。
18:18 押沙龍活啲的時,佇王的山谷為家己徛一支柱,因為伊講:「我無子通留我的名。」就用家己的名稱彼支柱,到今仔日稱做押沙龍的號表(hō-piáu)。
18:19 撒督的子亞希瑪斯講:「准我走去,報消息互王,就是耶和華有怎樣對伊的對敵報仇。」
18:20 約押給伊講:「你今仔日呣通去報消息,別日你通報消息;總是今仔日你呣通報消息,因為王的子已經死。」
18:21 約押古示人講:「你去將你所看見的給王講。」古示人對約押鞠躬(kiok-kiong),就走去。
18:22 撒督的子亞希瑪斯閣給約押講:「無論怎樣,求你准我隨古示人走去。」約押講:「我的子,你報消息,既然得著賞,啥事愛走去啊?」
18:23 伊閣講:「無論怎樣,我欲走去。」約押講:「你走去!」亞希瑪斯就對平洋的路走去,走做古示人的頭前。
18:24 大衛抵仔坐佇二個城牆的中間。守望(siú-bāng)的人絔上(peh-chiūⁿ)城牆到城門的樓頂,攑目觀看,看見一人單身走來。
18:25 守望者叫來給王講。王講:「伊若家己來,的確有消息欲報。」伊愈走愈近倚來,
18:26 守望的人閣看見一人走來,守望者給顧城門的人講:「看啊,有一人單身走來。」王講:「這也是報消息的。」
18:27 守望者講:「我看見頭前啲走者,親像撒督的子亞希瑪斯啲走的款。」王講:「伊是好人,來報好消息。」
18:28 亞希瑪斯對王叫講:「平安啦!」就佇王的面前仆佇地裡拜,講:「耶和華──你的上帝是應該著謳咾的,因為伊已經將許個起手攻擊我的主我的王的人交互你。」
18:29 王講:「少年人押沙龍平安抑無?」亞希瑪斯應講:「約押差王的奴僕,及你的奴僕,彼時我看見大喊嘩,呣知是甚麼代誌。」
18:30 王講:「你行開,徛佇邊仔。」伊就行開,徛啲。
18:31 古示人也到,古示人講:「有消息報互我的主我的王!耶和華今仔日對一切興起攻擊你的人給你報仇。」
18:32

王給古示人講:「少年人押沙龍平安無?」古示人應講:「願我的主我的王的對敵,及一切興起攻擊你欲害你的人,攏親像彼個少年人一樣。」

18:33 王就不止傷心,上城門頂的樓啼哭,愈行愈講:「我的子押沙龍啊!我的子,我的子押沙龍啊!我恨替你死,押沙龍啊,我的子!我的子!」


回聖經目錄