撒 母 耳 記 下

22:1	當耶和華救大衛脫離一切的對敵的手，及掃羅的手的日，伊向耶和華唸此個詩的話，
22:2	講：耶和華是我的山巖(soaⁿ-giâm)，我的營寨(iâⁿ-chē)，拯救我者，
22:3	上帝是我的石磐(chio̍h-pôaⁿ)，我欲倚靠伊。伊是盾牌(tîn-pâi)，是拯救我的角，是我的高台(koâiⁿ-tâi)，是我的避難所(pī-lān-só͘)。拯救我者啊，你是救我脫離強暴(kiông-pō )的。
22:4	我欲求叫耶和華，伊是應該謳咾的。按呢，我欲得著救脫離(thoat-lī)我的對敵。
22:5	死無的水湧圍我，匪類的氾濫互我驚。
22:6	陰間的索纏(tîⁿ)我，死無的活罩(oa̍h-tauh)到佇我。
22:7	我佇患難中求叫耶和華，我求叫我的上帝。伊對殿裡聽我的聲；我的求叫入伊的耳孔。
22:8	地就振動(tín-tāng)搖泏，天的根基(kun-ki)也栗栗戰(gī-gī-chùn)，為著伊的受氣來振動。
22:9	對伊的鼻孔有煙淐上去；對伊的嘴有出燒滅的火，炭對按呢。
22:10	伊互天低落來，就降臨；佇伊的腳下有黑雲。
22:11	伊騎兵啲飛，佇風的翅頂顯現。
22:12	伊用黑暗做周圍的帳房(tiùⁿ-pâng)，就是聚集的水、及空中的密雲。
22:13	因為伊面前的光，火炭就起來。
22:14	耶和華對天起雷；至高者發出伊的聲。
22:15	伊射箭來，趕散，閃爁(sih-nà )來互亂。
22:16	海底就出現，大地的根基也露現，是因為耶和華的責備，也因為伊的鼻孔歕出的氣。
22:17	伊對頂面伸手搝(khiú)我，對大水中牽我出。
22:18	伊救我脫離勇猛(ióng-béng)的對敵及許個怨恨我的人，因為比我卡有力。
22:19	我抵著患難的日，來窘迫我；總是耶和華是我所倚靠的。
22:20	伊導我到開闊的所在；伊救我，因為伊歡喜我。
22:21	耶和華照我的公義報答我，照我的手的清氣報賞我。
22:22	因為我守耶和華的道路，未曾做歹離開我的上帝。
22:23	伊一切的法度佇我的面前；伊的律例，我也無悖逆(pōe-ge̍k)。
22:24	我對佇伊是完全；我也守本身無行我的歹。
22:25	所以耶和華報賞我是照我的公義，也照我佇伊的目睭前的清氣。
22:26	對佇仁慈的人，你顯明家己是仁慈；對佇完全的人，你顯明家己是完全；
22:27	對佇清氣的人，你顯明家己是清氣；對佇乖僻的人，你顯明家己是彎曲。
22:28	困苦的百姓，你救伊；你的目睭看驕傲的人，互伊降低。
22:29	耶和華啊，你是我的燈；耶和華欲照光(chiò-kng)我的黑暗。
22:30	因為我倚靠你衝入軍隊，倚靠我的上帝就跳過牆。
22:31	論到上帝，伊的道路是完全的；耶和華的話是過鍛煉的。見若倚靠伊的，伊就做的盾牌。
22:32	耶和華以外，是誰是上帝啊？咱的上帝以外，是誰是石磐啊？
22:33	上帝是我堅固的營寨(iâⁿ-chē)，伊引導完全的人行伊的路。
22:34	伊互我的腳親像鹿母，互我徛佇我高的所在。
22:35	伊教示我的手會交戰，致到我的手骨會開銅弓。
22:36	你用你的拯救互我做盾牌；你的溫柔互我做大。
22:37	你互我的腳所踏的地開闊；我的腳也未曾踏脫(ta̍h-thu̍t)。
22:38	我追趇我的對敵，來剪除，未剿滅(châu-bia̍t)的代先，我無倒轉來。
22:39	我剿滅，拍傷，互起來；倒佇我的腳下。
22:40	因為你曾用氣力縖我，互我會交戰；你互許個起來攻擊我的攏降服(hâng-ho̍k)我。
22:41	你互我的對敵向我越轉身，互我通剪除許個怨恨我的人。
22:42	四界看，也無拯救的；就向望耶和華，伊也呣應伊。
22:43	我搥(tûi)幼幼(iù-iù)，親像地上的塵埃；我踏親像街路的土糜(thô͘-bê)，互四散。
22:44	你救我脫離我的百姓的相爭，保存我做列國的頭目(thâu-ba̍k)；我所呣識的百姓欲服事我。
22:45	外邦人欲投降我，一下聽見就欲遵趁我。
22:46	外邦人欲衰敗(soe-pāi)，對秘密的所在愕愕惙(ngia̍uh-ngia̍uh-chhoah)出來。
22:47	耶和華是活的，願我的石磐得著謳咾！願上帝──就是救我的石磐的得著尊做高(koâiⁿ)！
22:48	就是替我伸冤的上帝、互許個百姓降服我的。
22:49	救我脫離我的對敵的，閣舉起我，卡高許個起來攻擊我的；你救我脫離強暴的人。
22:50	耶和華啊，因為按呢我欲佇列邦感謝你，也欲唱歌謳咾你的名。
22:51	耶和華大大拯救伊所設立的王，施慈愛互伊所抹油者，就是互大衛及伊的後裔，到永遠！