阿 摩 司 書

1 2 3 4 5 6 7 8 9

4:1 巴珊的牛母踮佇撒瑪利亞山者,著聽此個話──恁欺負喪鄉人,壓制艱苦人,對的丈夫講:捧酒來,互阮飲!
4:2 主耶和華指家己的聖來咒誓講:看啊,日子欲臨到恁,人欲用鈎(kau)掠恁去,用釣魚鈎掠恁所剩者去。
4:3 恁逐人欲對破隙直直進前去,走入哈門。這是耶和華講的。
4:4 恁去伯特利犯罪,到吉甲加添恁的罪;逐早起獻恁的祭物,每三日獻恁的十份一。
4:5 獻有酵的物做謝恩祭,將甘心祭來報揚宣傳,以色列人啊,這是恁所歡喜者。主耶和華講伊啦。
4:6 我互恁佇逐個城內,嘴齒攏無物通哺,佇恁的逐所在欠缺米糧,恁猶久無歸向我。這是耶和華講的。
4:7 佇收割以前三月日,我禁止落雨佇恁遐,我落雨佇此個城,無落雨佇彼個城;此所在有雨,彼所在無雨;就枯焦。
4:8 按呢,二三個城的人,四界顛到一個城尋水,亦無通止渴;恁猶久無歸向我。這是耶和華講的。
4:9 我用枯焦、朽爛攻擊恁,恁的園的出產,恁的葡萄園、無花果樹、橄欖樹攏互剪蟲食去;恁猶久無歸向我。這是耶和華講的。
4:10 我降瘟疫佇恁中間,親像佇埃及的款;用刀刣死恁的少年人,恁許個馬互人牽去,營內的臭味淐到恁的鼻孔;恁猶久無歸向我。這是耶和華講的。
4:11 我捙倒恁中間幾若個城,親像上帝捙倒所多瑪蛾摩拉一樣,恁親像一塊仔柴對火中抽出來;恁猶久無歸向我。這是耶和華講的。
4:12 以色列啊,所以我欲按呢款待你;為著我欲按呢款待你,以色列啊,你著備辦來見你的上帝。
4:13 彼個創山、造風、將伊的心意指示人、互早起時變做黑暗、腳踏佇地裡高的所在者,伊的名就是萬軍的上帝──耶和華。



回聖經目錄