阿 摩 司 書

1 2 3 4 5 6 7 8 9

8:1 主耶和華互我看見一項:我看見一筐(kheng)夏天的果子。
8:2 伊講:「阿摩司啊,你看見甚麼?」我講:「看見一筐夏天的果子。」耶和華就對我講:「我的百姓以色列的末期到啦,我的確無閣寬恕。」
8:3 主耶和華講:「彼日,宮殿的唱歌欲變做啼哭;欲有多多身屍佇逐所在擲,人攏靜靜。」
8:4 恁諸個愛吞食喪鄉人、互此所在的困苦人衰敗者,著聽此個話!
8:5 恁講:月的初一甚麼時過去,互阮通糶五穀;安息日甚麼時過去,互阮通賣麥;用細的伊法,用重的舍客勒,用詭詐的天秤來騙人,
8:6 通用銀買喪鄉人,用一雙鞋換窮赤的人,將歹的麥賣互人。
8:7 耶和華指雅各的榮華來咒誓講:攏總的所做,我永遠無記得。
8:8 此個地豈無欲因為按呢來搖泏?徛起彼中間者豈無欲悲哀嗎?此個地欲親像大河漲起來,也欲振動退低親像埃及河。
8:9 主耶和華講:到彼日,我欲互日頭佇日中晝就落去,互地佇當頭白日變黑暗。
8:10 我欲互恁的節期變做悲哀,歌曲攏變做哀歌。欲互眾人腰縖麻布,頭殼無半支毛,閣互伊悲哀親像死孤生的子,到尾親像痛苦的日一樣。
8:11 主耶和華講:看啊,日子欲到,我欲互飢荒到佇此所在。飢荒呣是因為無餅,嘴乾呣是為著無水,就是因為無通聽耶和華的話。
8:12 欲四界去,對此個海到彼個海,對北到東,走來走去,尋求耶和華的話,亦尋無。
8:13 當彼日,媠的在室女及少年查甫人欲因為嘴乾來昏去。
8:14 許個指撒瑪利亞的罪來咒誓,閣指但活的上帝來咒誓;閣指別是巴的活路來咒誓者。的確跋倒,永閣起來。


回聖經目錄