歌 羅 西 書

1 2 3 4

1:1 對上帝的旨意,做基督耶穌的使徒保羅及兄弟提摩太
1:2 批寄互歌羅西佇基督的聖徒,忠信的兄弟。願恁對咱的父上帝得著恩典、平安!
1:3 阮常常替恁祈禱,感謝上帝就是咱的主耶穌基督的父;
1:4 因為曾聽見恁佇基督耶穌的信,及向攏總的聖徒所有的疼,
1:5 因為所給恁囥佇天裡的向望;就是恁前佇福音真理的道所聽見的。
1:6 此個福音已經到佇恁,親像佇遍世間啲結果子,也愈大欉,親像佇恁中間一樣,對恁曾聽見也真實知上帝的恩典彼日。
1:7 親像恁對以巴弗所學習的,伊是阮所疼、同做奴僕的。也為著阮做基督忠信的差用,
1:8 伊也曾將恁佇聖神的仁愛報阮知。
1:9 所以,阮對聽見的日,替恁祈禱懇求無息,願恁佇神靈逐樣的智慧及靈通,得著知伊的旨意到滿滿;
1:10 互恁所行合佇主,凡事互伊歡喜,佇逐項好事結果子,閣識上帝愈久愈進步;
1:11 閣照伊榮光的氣力,用逐樣的權能互恁有權能,致到恁凡事歡喜吞愞寬容;
1:12 閣感謝父,因為伊互咱堪(kham)得有份聖徒的業佇光明的所在。
1:13 伊已經救咱脫離黑暗的權勢,來搬徙咱入伊所疼的子的國;
1:14 佇伊咱得著贖回,就是咱的罪赦免。
1:15 伊是得通看見的上帝的像,伊是頭一個生的,佇攏總受創造者的代先。
1:16 因為萬物佇伊來創造,佇天裡,及佇地裡的;有通看見,及無通看見的;或是座位的,或是治理的,或是辦政事的,或是掌權的;萬項有攏是對伊,也為著伊才(chiah)受創造。
1:17 伊佇萬項有的代先;萬項有佇伊來相及徛在(khiā-khāi)。
1:18 伊是身軀的頭,身軀就是教會。伊是源起頭,對死人中起來的頭一個生的,互伊佇萬項有中做第一。
1:19 因為父歡喜互一切的豐盛佇伊。
1:20 已經將伊十字架的血來成就和平,就對伊互萬項有及伊本身閣再和──或是地上的、或是佇天裡的──攏是對伊。
1:21 閣恁平素佇歹的所行及上帝隔斷(keh-tn̄g),心內做對敵。
1:22 今伊佇伊肉體的身軀對伊的死,已經互恁閣再和,欲互恁諸個成聖,無瑕疵、無通嫌的,徛佇伊的面前。
1:23 若恁長長佇信,有地基閣堅固,無受搖動,來離開福音的向望。這福音就是恁所曾聽見的,閣是傳佇天下攏總受創造者的中間,我保羅已經設立做伊的差用。
1:24 今我為著恁受諸個艱苦,是歡喜;我為著基督的身軀,就是教會,佇我的肉體補滿伊所未有盡的患難。
1:25 我設立做此個教會的差用,照上帝為著恁所交付(kau-hù)我的職份,來圓滿上帝的道理,
1:26 就是萬世萬代以來所囥密的奧妙;今已經顯明佇伊的聖徒。
1:27 上帝愛(ài)欲互知此個奧妙的榮光佇外邦中有偌富有,就是基督佇恁,做榮光的向望的;
1:28 阮傳伊,用逐樣的智慧苦勸逐人,教示逐人,欲獻逐人佇基督來完全。
1:29 為著此個我著磨,照伊出力行佇我內面的功用(kong-iōng)來爭戰。