歌 羅 西 書

1 2 3 4

3:1 所以,恁若曾及基督同復活,就著求佇頂面的事;基督佇遐坐佇上帝的大旁。
3:2 著致意頂面的事,呣通致意地上的事。
3:3 因為恁曾死,也恁的活命及基督相及囥佇上帝。
3:4 基督是咱的活命,到伊顯明的時,恁也欲相及顯明佇榮光的中央(ng)。
3:5 所以,恁著拍死恁佇地裡的百體,就是姦淫、污穢(ù-oè)、邪的心情、歹的私慾、及貪心(就是拜偶像)。
3:6 因為對諸個事,上帝的受氣臨到悖逆(poē-ge̍t)的人。
3:7 恁活佇中間的時,也曾行佇諸個。
3:8 若是此霎恁也著除去諸個一切的事,就是怨恨、受氣、惡毒、誹謗(húi-pòng),及嘴內見誚的話。
3:9 莫得講白賊相騙;因為恁已經褪去舊的人及伊的行做,
3:10 也有穿新的人,就是日日換新到得著知識(chai-bat),照創造伊者的像。
3:11 其中無有分別希利尼猶太、割禮的、無割禮的、化外的人、西古提人、做奴僕的、自由的,獨獨基督是萬有,閣佇萬有中。
3:12 恁既然互上帝所揀,是聖也得著疼的,著用憐憫的心、及仁慈、謙卑、溫柔、吞愞來穿。
3:13 設使二彼有挾嫌(hia̍p-hiâm),就著相寬容,相赦免;親像主曾赦免恁,恁也著按呢。
3:14 佇諸個的頂面,著穿仁愛,就是完全的結聯。
3:15 著互基督的和平佇恁心內做主;恁受召成做一體,也是為著此個;閣著感謝。
3:16 著互基督的道理,佇逐樣的智慧充滿佇恁的心,用詩、用歌、用神的賦(hù),相教示,相苦勸,對恩典佇心內啲吟來謳咾上帝。
3:17 閣凡所做的,或是講或是行,攏著佇主耶穌的名來做伊,也對伊來感謝父上帝。
3:18 做婦仁人的,恁著順服丈夫,照佇主所合宜的。
3:19 做丈夫的,恁著疼婦仁人,呣通歹款待
3:20 做子兒的,恁著凡事順趁父母,因為這是主所歡喜的。
3:21 做老父的,恁呣通激(kek)互恁的子兒受氣,驚了(kiaⁿ-liáu)失志。
3:22 做奴僕的,恁著凡事順趁許個照肉體做恁的主人的,呣是用彼號佇人的目睭前的殷勤,親像取互人歡喜的,著用誠實心敬畏主。
3:23 見若恁所做,著出佇心來做,親像服事主,呣是服事人,
3:24 知恁欲對主得著承接業的報賞;恁是服事主基督。
3:25 因為行(kiâⁿ)不義的欲受伊不義的報應;上帝也無照外貌取人(lâng)。

回聖經目錄