歌 羅 西 書

1 2 3 4

4:1 做主人的,恁著用義及公平款待恁的奴僕,因為知恁也有主佇天裡。
4:2 著常常專務祈禱,祈禱的時著警醒來感謝。
4:3 閣替阮祈禱,求上帝給阮開傳道理的門,通講基督的奧妙(我為著此個也受縳),
4:4 互我闡明伊照我所應該講的。
4:5 向許個外面人恁著佇智慧來行,著保惜機會。
4:6 恁的所講著常常用(ēng)溫純,親像用鹽調和,就會曉(oē-hiáu)得怎樣來應逐人。
4:7 我攏總的事推基古欲給恁講。伊是所疼的兄弟,佇主做忠信的差用,也同做奴僕的。
4:8 為著按呢我刁持差伊就近恁,互恁知阮的事,也互伊安慰恁的心。
4:9 也差阿尼西謀及伊去;伊就是忠信通疼的兄弟,也是恁遐的人。欲將此所在的事攏給恁講。
4:10 及我同關監的亞里達古,及巴拿巴的表小弟馬可請安恁。(論馬可,恁已經受著命令;伊若來就近恁,恁著接納伊。)
4:11 叫做猶士都耶數,也請安恁。此幾人是屬割禮的,只有為著上帝的國及我同著磨,也是互我得著安慰的。
4:12 基督耶穌的奴僕以巴弗,就是恁遐的人,請安恁。伊佇祈禱的中間,常常為著恁出力,互恁徛在完全,滿心信服上帝一切的旨意。
4:13 我干證伊,為著恁及佇老底嘉以及希拉坡里的人有多多勞苦。
4:14 路加就是所疼的醫生及底馬請安恁。
4:15 請安老底嘉諸個兄弟以及寧法,及聚集佇的家的教會。
4:16 此個批已經讀佇恁中間,著設法互老底嘉人的教會,也讀伊;閣恁著讀對老底嘉來的批。
4:17 閣著給亞基布講:「著謹慎,來盡你佇主所受的職份。」
4:18 保羅親筆請安恁。恁著數念我掛鐵鍊。願恩典及恁佇啲!