以 斯 帖 記

1 2 3 4 5 6 7 8 9 10

2:1 諸個代誌以後,亞哈隨魯王的受氣息,就數念瓦實提及伊的所行,及伊怎樣降旨來辦伊。
2:2 對按呢跟隨王的人臣給伊講:「著給王尋媠的在室女幾若人。
2:3 王著派官員佇伊國內的逐省,互招集一切媠的在室女到書珊的王宮,到女院,交互王的太監希該,就是掌管女子的,也著供給清氣身軀的品料。
2:4 王所合意的女子通設立伊做王后,來替瓦實提。」王掠此個事做好,就按呢行。
2:5 書珊宮有一個猶大人,名叫末底改,是便雅憫基士的曾孫(cheng-sun),示每的孫,睚珥(Gâi-jíⁿ)的子。
2:6 巴比倫尼布甲尼撒遷徙猶大耶哥尼雅末底改也對耶路撒冷受遷徙,佇彼幫受掠的人的中間。
2:7 伊培養伊的叔的查某子哈代沙(也名以斯帖),因為此個查某囝仔無父母。伊的面貌媠閣好看;伊的父母已經死,末底改就接納伊做家己的查某子。
2:8 王的命令及詔書已經宣佈,就聚集多多女子佇書珊的王宮,交佇希該的手;彼時以斯帖也送入王宮,交互管女子的希該的手。
2:9 此個女子得著希該歡喜伊,好款待伊,趕緊用清氣身軀的品料互伊及伊應該得著的份額,也對王宮將應該互伊的七個宮女互伊,搬徙伊及伊許個宮女到女院上好的所在。
2:10 以斯帖呣曾給人講伊是甚麼籍(sím-mi̍h-che̍k)甚麼族,因為末底改教伊呣通給人講。
2:11 末底改逐日佇女院的頭前行來行去,愛知以斯帖平安抑無,及伊將來境遇(kéng-gū)怎樣。
2:12 照婦女的例預備十二月日:就是六月日用沒藥的油,六月日用香料及女子清氣身軀的別號物。清氣的日已經滿,眾女子就照次序入去見亞哈隨魯王。
2:13 女子入去見王是此款:對女院到王宮的時,見若伊所愛的攏互伊,伊續帶去。
2:14 下昏時入去,隔早起倒來第二個女院,交互王的太監,就是管理嬪妃的沙甲的手;若呣是王歡喜伊,閣提起伊的名來召伊,就無閣入去見王。
2:15 末底改接納做伊的查某子的以斯帖,就是伊的叔亞比孩的查某子,照次序著入去見王的時,除去王的太監掌管女子的希該所派互伊的,另外無討別物。見若看著以斯帖的攏歡喜伊。
2:16 亞哈隨魯王坐位第七年十月,就是提別月以斯帖得著選入王宮見王。
2:17 王疼以斯帖贏過眾女子,伊佇王的目睭前得著恩典寵愛贏過眾在室女。王就用王后的冕旒戴佇伊的頭殼,設立伊做王后,來替瓦實提
2:18 彼時王為許個大臣百官設大筵席,就是以斯帖的筵席,閣安撫逐省,照王的富足賞賜物件。
2:19 許個在室女第二擺聚集的時,末底改坐佇王的門。
2:20 以斯帖末底改所命令的,未曾(bē-bat)給人講伊是甚麼族,甚麼籍;因為以斯帖遵趁末底改的命令,親像前得著伊撫養的時一樣。
2:21 當許個日,就是末底改坐佇王的門的時,王的太監中有顧門者二人,辟探提列,受氣,計謀欲害亞哈隨魯王
2:22 末底改知彼個代誌,就給王后以斯帖講。以斯帖就用末底改的名,將彼個事講互王知;
2:23 究勘(kiù-khàm)此個事,果然是實,就將二人吊佇柴裡,用此個事佇王的面前記載佇歷史的冊。


回聖經目錄