以 斯 帖 記 Esther

1 2 3 4 5 6 7 8 9 10

6:1 彼暝王睏得,教人提歷史的冊來,就佇王的面前讀伊。
6:2 抵著冊裡有寫講:王顧門的太監中有二人,辟探提列,計謀欲害亞哈隨魯王,末底改報告此個事。
6:3 王講:「為著此個事,用甚麼榮光尊貴賞賜末底改啊?」伺候王的人臣應講:「無賞賜伊甚麼。」
6:4 王講:「是誰佇院內?」(彼時哈曼入王宮的外院,欲求王吊末底改佇伊所給伊徛的柴架。)
6:5 王的人臣給伊講:「哈曼徛佇院內。」王講:「教伊入來。」
6:6 哈曼就入去。王問伊講:「王所愛榮光伊的人,著怎樣款待伊?」哈曼心內想講:「王所愛榮光伊的人,是誰會贏過我?」
6:7 哈曼就應王講:「王所愛榮光伊的人,
6:8 著將王所穿的王服,王所騎的馬,頭殼頂戴冕旒的,
6:9

著將此個衣服及馬交佇王一個極尊貴的人臣的手,互用彼領衫互王所愛榮光伊的人穿,閣互伊騎馬,遍遊城內的街路佇伊的頭前宣佈講:王所愛榮光的人,欲按呢款待伊。」

6:10 王給哈曼講:「你緊緊去將此個衣服及馬,照你所講的,款待彼個坐佇王的門的猶大末底改。見若你所講的,呣通少一項。」
6:11 哈曼就帶衣服及馬來,閣互末底改穿伊,也互伊騎馬,遍遊佇城內的街路,佇伊的頭前宣佈講:「王所愛榮光伊的人,欲按呢款待伊。」
6:12 末底改倒來王的門,哈曼憂悶罩伊的頭殼,緊緊倒去厝,
6:13 哈曼將伊一切所抵著的攏給伊的某細利斯及伊許個朋友講。伊許個智識的人及伊的某細利斯給伊講:「你所起頭失敗佇伊面前的末底改,伊若果然是猶大的種族,你的確贏伊,欲佇伊的面前失敗到底。」
6:14 猶啲及伊講話的時,王的太監來教哈曼緊緊去赴以斯帖所設的筵席。


回聖經目錄