以 斯 帖 記

1 2 3 4 5 6 7 8 9 10

7:1 王及哈曼來赴王后以斯帖的筵席(iân-sia̍h)。
7:2 此個第二日王佇酒筵席的中間,閣問以斯帖講:「王后以斯帖啊,你所請是甚麼,欲互你;你所求是甚麼,就國的一半也欲做成(chòe-chiâⁿ)伊。」
7:3 王后以斯帖應講:「王啊,我若得著恩典佇你的目睭前,王若掠做好,就願你允我所請,用我的生命互我;允我的所求,用我的宗族互我。
7:4 因為我及我的宗族受賣,欲剿滅刣死阮互阮死無。設使賣阮做奴僕做女婢,雖然對敵會補王的損失,我也靜靜。」
7:5 亞哈隨魯王應王后以斯帖講:「敢存心做此個事的是是誰?彼人佇叨落!」
7:6 以斯帖講;「仇讎(kiû-siû)對敵就是此個歹人哈曼!」哈曼佇王及王后的面前就真驚。
7:7 王大受氣,對酒筵起來入去王宮的花園。哈曼也起來對王后以斯帖求生命,因為看見王決意欲刑罰伊。
7:8 王對王宮的花園倒轉來酒筵的所在,彼時哈曼已經仆落佇以斯帖所佇啲的床,王講:「伊閣佇宮內、佇我的面前欲凌辱王后嗎?」話對王的嘴講出,人就蓋哈曼的面。
7:9 伺候王的太監有一個名叫哈波拿,講:「看啊,哈曼為著末底改徛一個五十肘高的柴架,末底改就是前日用盡忠的話報王的,今彼個架徛佇哈曼的家。」王講:「吊伊佇彼頂面。」
7:10 人就吊哈曼佇伊給末底改所備辦的柴架頂。王的受氣才息。