以 西 結 書

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48

17:1 耶和華的話臨到我講:
17:2 「人子啊,你著對以色列家出猜,設譬喻,
17:3 講主耶和華按呢講:有一隻大鷹,翅股大,翅尾長,毛草實,有五彩色,飛到黎巴嫩,取柏香樹中枝的枝尾,
17:4 遏折伊盡尾溜茈的枝,含到生理場,下佇買賣的人的城;
17:5 閣取彼所在的種,栽佇肥地,插佇多多水的邊頭,親像栽柳樹,
17:6 就漸漸大欉,成做葩藤低低的葡萄樹。伊的枝轉向彼隻鷹,根佇伊的下面,對按呢成做葡萄樹,生枝發藤。
17:7 「閣有一隻大鷹,翅大,毛實。看啊,此個葡萄樹對栽種的所在彎伊的根向伊,發伊的枝向伊,向望伊灌溉。
17:8 伊栽佇肥地多多水的邊頭,通發枝結果子,成做好的葡萄樹。
17:9 你著講,主耶和華按呢講:此個葡萄樹豈會發艷?鷹豈拔伊的根,除伊的果子,互伊枯焦嗎?互伊幼的葉攏枯焦,也呣免用大力及多多人拔出伊的根。
17:10 伊已經栽種,豈會發艷嗎?東風一下吹伊,豈b枯焦嗎?欲佇伊發生的所在枯焦。」
17:11 耶和華的話閣臨到我講:
17:12 「你著給彼個悖逆的家講:恁豈呣知諸個是甚麼意思嗎?你著給講,巴比倫王到耶路撒冷,掠伊的君王及貴族,帶到伊巴比倫遐。
17:13 對王親的中間揀一人及伊立約,教伊咒誓,閣掠國內有勢力的人,
17:14 欲互國卑微會自強,獨獨守盟約就得著保存。
17:15 總是伊背叛,差使者去埃及,愛互伊馬及多多兵。伊豈會亨通嗎?行此號事的人豈會逃脫嗎?豈有背約猶走會離嗎?
17:16 主耶和華講:我指家己的永活來咒誓,巴比倫王設立伊做王。伊竟然藐視咒誓的話,背所立的約。因為按呢,伊的確死佇巴比倫王所踮的所在。
17:17 起土堆造台,欲滅無多多人的時,法老導大隊兵及多多人來,也佇交戰中幫助伊。
17:18 伊背約來藐視咒誓,看啊,伊已經投降,猶久做出諸個一切的事,伊的確會逃脫。
17:19 所以主耶和華按呢講:「我指我的永活來咒誓,伊已經看輕指我所咒的誓,悖謬(pōe-biū)指我所立的約,我欲將此個罪歸佇伊的頭殼。
17:20 我欲用我的網拋佇伊的身上,伊欲互我的活罩罩著。我欲帶伊到巴比倫,亦欲佇遐審問伊干犯我的罪。
17:21 伊的軍隊中逃走者,攏欲倒佇刀下;所剩者,亦欲四散佇四方。恁就知講此個話者,是我──耶和華。」
17:22 主耶和華按呢講:「我亦欲取柏香樹中枝高的尾溜,來栽伊,亦欲對伊茈的枝的尾溜,遏折伊軟的枝,栽佇高高的山;
17:23 我欲栽伊佇以色列高地的山。伊就開枝結子,成做好的柏香樹,各樣的飛鳥欲歇佇伊的下面,歇佇伊的枝的蔭影下。
17:24 田野的樹木攏欲知我──耶和華互高的樹降低,低的樹升高;青翠的樹枯焦,枯焦的樹茂盛。我─耶和華按呢講伊,也成伊。」


回聖經目錄