以 西 結 書

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48

38:1 耶和華的話臨到我講:
38:2 「人子啊,你著面向瑪各地的歌革,就是羅施、米設、土巴的人君,宣傳來攻擊伊,
38:3 講主耶和華按呢講:羅施米設土巴的人君歌革啊,看啊,我做你的對敵。
38:4 我欲互你越轉,用鈎鈎你的牙槽,將你及你的軍兵、馬匹、馬兵帶出來,攏穿真媠的戰甲,成做大的軍隊,夯大小的盾牌,逐個攑刀劍。
38:5 波斯人、古實人,及人及來,逐個夯盾牌戴頭盔;
38:6 歌蔑(ko-bia̍t)及伊的軍隊,北方極頭的陀迦瑪族及伊的軍隊,閣有多多百姓及你做陣。
38:7 「你著家己備辦,你及聚集佇你遐的軍隊攏著備辦;你著做in的元帥。
38:8 多多日後,你欲受辦理。到路尾的年,你欲來到脫離刀劍對列國收回的地,到以色列久久拋荒的山;總是伊已經對列國中帶出,攏欲安然徛起。
38:9

你及你的軍隊,以及及你相及來多多國的百姓,攏欲上來親像狂風來,你欲親像雲遮蓋地。」

38:10 主耶和華按呢講:「到彼日,欲有意思興起佇你的心,你欲圖謀歹的計謀,
38:11 講:『我欲上到鄉社的地,到靜靜安然徛起的百姓遐,所徛起的攏無城牆,也無門、無閂(chhòaⁿ)。
38:12 通搶所欲搶的,劫所欲劫的,越轉你的手攻擊許個前拋荒、今有人徛起的地,以及彼個徛起世界的中心點、對列國聚集、得著精牲貨財的百姓。』
38:13 示巴人、底但人、他施的生理人,及中間勇的獅攏欲對你講:『你來是欲搶所搶的嗎?你聚集你的軍隊是欲劫所劫的嗎?欲提金銀,帶精牲、貨財去嗎?欲大大搶所搶的嗎?』
38:14 「人子啊,你著因為按呢宣傳,對歌革講,主耶和華按呢講:當我的百姓以色列安然徛起的日,你豈無得著知嗎?
38:15 你欲對你的本所在,對北方的極頭來,你及多多國的百姓相及來,攏是騎馬,做大陣多多的軍隊。
38:16 你欲上來攻擊我的百姓以色列,親像密雲遮蓋地。佇路尾的日,我欲導你來攻擊我的地,歌革啊,到我佇列邦的面前,佇你的身上顯明做聖的時,通互識我。
38:17 主耶和華按呢講:我佇早時用我的奴僕以色列的先知所講的,就是你嗎?當許個日歷年讖語我欲導你來攻擊。」
38:18 主耶和華講:「歌革上來攻擊以色列地的日,我的受氣欲對我的鼻孔出。
38:19  因為我怨妒及大受氣親像火就講:彼日佇以色列地的確有大振動,
38:20 甚至海中的魚、空中的飛鳥、田野的獸,以及地上一切啲趖(teh-sô)的蟲(thâng-thōa),及地面上的眾人,佇我的面前攏欲振動;山嶺欲崩裂,山崁欲倒壞,牆壁攏欲倒落去。」
38:21 主耶和華講:「我欲命令我諸個山發出刀劍來攻擊歌革;逐人欲用伊的刀劍刣伊的兄弟。
38:22 我欲用瘟疫及流血來辦伊。我也欲用大雨、大雹及火,及硫磺降落互伊及伊的軍隊,以及及伊的眾百姓。
38:23 我欲顯明家己做大,顯明家己做聖,也欲顯現佇多多國人的面前;就知我就是耶和華。」


回聖經目錄