以 西 結 書

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48

46:1 主耶和華按呢講:「內院向東的門,佇做工的六日內的確著關;獨獨佇安息日著開,月的初一也著開。
46:2 人君著對此個門的廊對外面入,徛佇門豎邊。祭司著備辦伊的燒祭及伊的謝恩祭,伊著佇門椗彼叨敬拜,然後出去。此個門到下昏時呣通關。
46:3 佇諸個安息日及月的初一,國內的百姓著佇此個門口,敬拜佇耶和華的面前。
46:4 人君佇安息日,所著獻互耶和華的燒祭,著無瑕疵的羊羔六隻,無瑕疵的綿羊牨一隻;
46:5 伊的素祭為著彼隻綿羊牨著一個伊法,為著許個羊羔的素祭是照伊的力量,一個伊法配油一欣。
46:6 當月的初一,著獻無瑕疵的牛牨一隻,羊羔六隻,綿羊牨一隻,攏著無瑕疵的。
46:7 伊也著備辦素祭,為著牛牨獻一個伊法,為著綿羊牨獻一個伊法,為著許個羊羔就照伊的力量,一個伊法配油一欣。
46:8 人君入來的時著對此個門的廊入,也著對此個路出。
46:9 「佇逐個節期,國內的百姓朝見耶和華的時,對北門入來敬拜的,著對南門出去;對南門入來的,著對北門出去。呣通對所入的門越倒轉,著直直進前出去。
46:10 百姓入去的時,人君也著佇的中間入去;百姓出去,人君也著及in出去。
46:11 「佇節期及大會的時,素祭著為著一隻牛牨獻一個伊法,為著一隻綿羊牨獻一個伊法,為著許個羊羔就照伊的力量,一個伊法配油一欣。
46:12

人君若備辦甘心的祭,燒祭抑是謝恩祭,做甘心的祭獻互耶和華,著有人給伊開向東的門。伊著備辦伊的燒祭及伊的謝恩祭,親像佇安息日所做一樣,然後伊著出去。出去了,著有人給伊關門。」

46:13 「逐日,你著備辦無瑕疵未滿年的羊羔一隻,做燒祭獻互耶和華;逐早起著備辦伊。
46:14 逐早起也著備辦相及獻的素祭,一伊法六份的一份,及一欣油三份的一份,摶和麵粉。此個素祭著常常獻互耶和華做永遠定著的例。
46:15 逐早起著按呢備辦羊羔、素祭,及油做常常獻的燒祭。」
46:16 主耶和華按呢講:「人君若將產業互伊的子的一個,就是做伊的業,歸佇伊許個子是承接做業的。
46:17 總是伊若將伊的產業的一份互伊的人臣的一個,是做人臣的到自由的年,彼時猶原歸佇人君。論到伊的產業,著留互伊許個子。
46:18 人君呣通搶奪百姓的產業,來趕離開所承接的;伊著對家己的業中,將產業互伊的子;免得我的百姓四散,逐人離開伊所承接的。」
46:19 伊就導我對門邊的路入來到祭司向北許個聖的房間,看啊,後面西勢有一所在。
46:20 伊就給我講:「這是祭司煮補過失祭及贖罪祭,以及煏素祭的所在;免得帶到外院,互百姓成做聖。」
46:21 伊閣導我出去到外院,互我經過院四個角頭,看啊,佇彼個院逐個角頭各有一個院。
46:22 佇院的四角頭有院,四面有牆圍啲,逐個院長四十肘,闊三十。四個角頭的院,的寸尺攏一樣,
46:23 四個院的周圍有起一列,伊的下面攏有煮物的所在。
46:24 伊給我講:「諸個就是煮物的灶腳,殿內諸個做差用者佇遮煮百姓的祭祀。」