以 西 結 書

5:1	「人子啊，你著攑一支利劍，做你的剃頭刀，來剃你的頭毛及你的嘴鬚，然後用厘戥(lî-téng)戥伊的重輕來分伊。
5:2	圍困城的日已經滿 你著將三份的一份佇城內用火燒伊，將三份的一份佇伊的四圍用刀拍伊，將三份的一份撒散互風吹去；我亦欲拔刀追趇(jip)伊。
5:3	你著對彼中間提幾若支縛佇你的衫仔裾，
5:4	閣對彼中間提淡薄仔佇火中，用火燒伊。對遐欲有火出到佇以色列全家。
5:5	主耶和華按呢講：這是耶路撒冷。我欲安置伊佇列邦中；列國佇伊的四圍。
5:6	伊行歹，違逆我的法度，比列邦卡傷重；干犯我的律例，比四圍的列國卡慘，因為伊棄拺我的法度。我的律例，亦無遵趁。
5:7	所以主耶和華按呢講：因為恁擾亂比恁四圍的列邦卡傷重，無遵趁我的律例，無執守我的法度，亦呣趁恁四圍列國的法度，
5:8	所以主耶和華按呢講：看啊，我欲攻擊你，我欲佇恁中間審判恁，互列國親目看見；
5:9	閣因為一切可惡的事，我欲佇你中間行我所未曾行，以後亦無閣按呢行的。
5:10	因為按呢，佇你的中間老父欲刣子來食，子亦欲刣老父來食。我欲佇恁中間審判恁，我欲將你所剩的眾人攏四散in佇四方。」
5:11	因為按呢，主耶和華講：「我指我的永活來咒誓，為著你用一切可惡的物、通厭賤的事拍垃墋我的聖所，我也欲減少你的人額，我的目睭無欲疼惜你，我亦無欲憐憫你。
5:12	你三份的一份欲對瘟疫來死，亦對飢荒來消滅佇恁中間；三份的一份欲佇你的四圍倒佇刀下；三份的一份我欲四散佇許個風，亦欲拔刀追趇。
5:13	「親像按呢我的受氣得著成；我大受氣的欲息，我就受安慰。閣我大受氣的已經成，就通知我──耶和華是熱心來講的；
5:14	我欲互你做冷靜做凌辱，佇你四圍的列邦中，互經過的人親目看見。
5:15	按呢，我欲用受氣及大受氣，及嚴嚴的責備，佇你的中間審判你。彼時，你就佇四圍的列邦中成做通凌辱、通譏刺、通鑑戒、通卬愕。這是我───耶和華講的。
5:16	彼時，我用飢荒會剿滅人的歹箭射，就是我所射來剿滅恁者，我亦欲加添恁的飢荒，斷絕恁所倚靠的米糧；
5:17	閣欲飢荒惡獸到恁遐，欲互恁的子死了了，閣瘟疫及刣人的事亦欲流行佇恁遐；我亦欲互刀劍臨到恁。這是我──耶和華講的。」