以 斯 拉 記

1:1	當波斯王古列元年，因為欲應驗耶和華託耶利米所講的話，耶和華就激動波斯王古列的心，互伊宣佈佇通國閣寫伊講：
1:2	「波斯王古列按呢講：『天頂的上帝耶和華將天下的萬國賞賜我，閣命令我佇猶大的耶路撒冷給伊起殿。
1:3	恁中間見若做伊的百姓的，通上去猶大的耶路撒冷，佇耶路撒冷閣起耶和華──以色列上帝的殿。願伊的上帝及伊佇啲（伊真正是上帝）。
1:4	見所剩的人，無論寄腳佇甚麼所在，彼所在的人著用金銀、財物、精牲幫助伊，另外也著為耶路撒冷上帝的殿甘心獻禮物。』」
1:5	對按呢，猶大及便雅憫的族長( ho̍k-tiúⁿ)、祭司、利未人，見若互上帝激動伊的心的，攏起來欲上去耶路撒冷起耶和華的殿。
1:6	四圍的人就用銀器、用金、財物、精牲、寶貝補助，另外閣有甘心(kam-sim)獻的禮物。
1:7	古列王也將耶和華殿內的器具提出來，就是前尼布甲尼撒對耶路撒冷搬來、下佇伊許個上帝的廟的。
1:8	諸個器具波斯王古列託管庫房的米提利達提出來，點算伊交互猶大的首領設巴薩。
1:9	的數額記佇下面：金盤三十塊，銀盤一千塊，刀二十九支，
1:10	金碗三十塊，銀碗第二扮的四百一十塊，別樣的器具一千件。
1:11	金銀的器具共五千四百件。帶受掠的人對巴比倫上到耶路撒冷的時，設巴薩將諸個攏帶上去。