加 拉 太 書

1 2 3 4 5 6

3:1 戇的加拉太人啊,耶穌基督釘十字架,已經形容真明佇恁的目睭前,今恁互是誰迷去啊?
3:2 我干單問恁一項:恁前受著聖神,是對趁(thàn)律法來行?抑(á) 是對聽來信啊?
3:3 恁到即戇啊?恁既然佇聖神做起頭,今就佇肉體成尾嗎?
3:4 恁受許多項的艱苦豈空空嗎?總無真正空空啊?
3:5 彼個賞賜恁聖神,閣出力行諸個權能佇恁中間的,是對恁趁律法來行?抑是對恁聽來信啊?
3:6 親像「亞伯拉罕信上帝,就給伊算做義」。
3:7 所以,恁著知:見若信的人,就是亞伯拉罕的子孫。
3:8 聖經代先看出上帝欲互外邦人對信稱做義,就代先傳福音互亞伯拉罕,講:「萬邦欲對你得著福氣。」
3:9 可見見若信的人及有信的亞伯拉罕同得著福氣。
3:10 見若靠本身行律法的,攏受咒詛;因為有記載講:「見若無長長照律法的冊攏總所記載來行伊的,著受咒詛。」
3:11 今靠律法無人佇上帝的面前稱做義,是明;因為:「義的人欲對信來活。」
3:12 若是律法呣是對信,獨獨:「行諸個的,欲對諸個來活。」
3:13 基督已經贖回咱脫離律法的咒詛,因為伊為著咱成做咒詛;因為有記載講:「見若吊佇柴裡的受咒詛。」
3:14 欲互亞伯拉罕的福氣,對基督耶穌續到佇外邦,互咱對信得著所應允的聖神。
3:15 兄弟啊,我照人的代誌來講:雖然是人的約,若已經定著,就無人給伊廢無抑是加添。
3:16 今諸個應允是對亞伯拉罕以及伊的後裔講。伊無講「以及你諸個後裔」,親像指多多人,是講「以及你的後裔」,親像指一人,就是基督。
3:17 今我講,上帝所代先定著的約,呣是彼個四百三十年後的律法所會給伊廢無,致到所應允的歸佇空空。
3:18

因為承接家業,若是對律法,就無對應允;總是上帝恩賜亞伯拉罕是照應允。

3:19 按呢律法是怎樣?是為著諸個過失來加設,聽候彼個得著應允的後裔到,也是對天使經過中保的手來設。
3:20 今中保呣是做一個的中保;若是上帝是一個。
3:21 按呢,律法及上帝的應允對逆嗎?斷斷呣是!因為若曾傳一個律法會互人活的,就義實在是對律法。
3:22 總是聖經已經將萬人圍佇罪惡內,欲互所應允的通對信耶穌基督,來賞賜許個信的人。
3:23 總是此個信未到的代先,咱受顧守佇律法下,圍啲來聽候欲顯明的信。
3:24 按呢,律法是做管顧囝仔的,導咱到基督,互咱對信來稱做義。
3:25 若是信已經到,就無閣降服佇管顧囝仔的。
3:26 因為恁對信靠基督耶穌攏做上帝的子。
3:27 因為恁見若受洗禮來入佇基督的,是曾穿基督。
3:28 無有猶太、抑是希利尼、奴僕、抑是自由的,查甫人婦仁人的分別,因為恁佇基督耶穌攏是一個。
3:29 恁若屬基督,就做亞伯拉罕的後裔,照應允來做後嗣(sû)。


回聖經目錄