加 拉 太 書

1 2 3 4 5 6

4:1 今我講後嗣,雖然是全業的主,猶做囝仔的時及奴僕無各樣,
4:2 就是降服監督的及管家的,聽候老父所限定的期到。
4:3 親像按呢,咱做囝仔的時,也做奴僕,降服此世間的小學。
4:4 若是到彼個時已經滿,上帝差伊的子,對婦仁人來出世,出世佇律法下,
4:5 來贖回律法下的人,互咱受設立做子。
4:6 為著恁是做子,上帝差伊的子的神入咱的心,喉叫講:「阿爸!父啊!」
4:7 親像按呢,你呣是猶(iû)原做奴僕,就是做子;既然做子,就對上帝來做後嗣。
4:8 總是當時恁呣識上帝,做許個生成呣是上帝者的奴僕;
4:9 若是今已經識上帝,卡好著講互上帝所識,怎樣倒轉閣向許個軟茈(núg-chiáⁿ)空空的小學,就是恁所愛閣重再做的奴僕的啊?
4:10 恁致意守日、月、節、年。
4:11 我替恁真驚,驚了我所為著恁著磨的會空空。
4:12 兄弟啊,我求恁著親像我,因為我也親像恁。
4:13 恁攏未曾剋虧我。恁知我頭一擺傳福音互恁,是因為肉體的軟弱。
4:14 彼霎為著我的肉體恁有受試,猶久無看輕,也無厭賤,是接納我,親像上帝的天使,也親像基督耶穌一樣。
4:15 恁當時所歡喜的福氣佇叨落?因為我干證恁,設使會做得,恁就挖恁的目睭互我。
4:16 今我用真實給恁講,是成做恁的仇讎(kiû-siû)嗎?
4:17 及恁親熱,呣是好意,是愛隔斷恁,互恁及親熱。
4:18 獨獨佇好事,來常常互人及恁親熱的是好,呣若我及恁佇啲的時著按呢。
4:19 我的細子啊,我為恁閣受生產的艱苦,到基督的形狀成佇恁的心。
4:20 我愛此霎及恁佇啲,來換我的聲,因為我為著恁躊躇(tiû-tû)。
4:21 恁愛降服律法的,著給我講,恁豈無聽見律法嗎?
4:22 因為有記載講,亞伯拉罕有二個子,一個是女婢生的,一個是自由的生的。
4:23 若是彼個對女婢的是照肉體來生;彼個對自由的是對應允來生。
4:24 諸個攏有譬喻佇啲:因為彼二個婦仁人是做二個約。一個出佇西奈山,所生的做奴僕,就是夏甲
4:25 此個夏甲亞拉伯西奈山,閣及現今的耶路撒冷像類,因為伊及伊諸個子做奴僕。
4:26 獨獨佇頂面的耶路撒冷是自由,是咱的老母。
4:27 因為有記載講:你無懷孕、無生子的,著歡喜;無有生產的艱苦的,著出大聲來叫;因為家己住的婦仁人,比有丈夫的,伊的子猶卡多個。
4:28 兄弟啊,咱親像以撒,做應允的子。
4:29 若是親像當時照肉體來生的窘逐照神來生的,此霎也是按呢。
4:30 呣拘聖經講怎樣?「著趕出女婢及伊的子!因為女婢的子決斷通及自由者的子同承接業。」
4:31 兄弟啊,按呢咱呣是女婢的子,是自由者的子。


回聖經目錄