創 世 紀

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

2:1 天地及伊一切所有的已經做完。
2:2 佇第七日,上帝完伊所造的工,就佇第七日息伊一切所造的工。
2:3 上帝賜福佇第七日,定做聖日;因為佇此日,上帝停伊一切創造的工,就安息。
2:4 天地創造的來歷,佇耶和華上帝造地及天的日,親像下底,
2:5 山野一切的草木未有佇地裡,山野一切的菜蔬未有發;因為耶和華上帝無落雨佇地裡,也無人通種作彼個土地,
2:6 總是有霧對地起,潤澤(lūn-tèk)遍地面。
2:7 耶和華上帝用地上的土粉摶做人,歕活的氣入伊的鼻孔,人就成做活的靈魂。
2:8 耶和華上帝佇東方佇伊甸種一個園,將所造的人下佇遐。
2:9 耶和華上帝互逐樣的樹對地裡發起來,好看也好食。佇園的中間閣有活命的樹及分別好歹的樹。
2:10 伊甸有河流出來,灌沃彼個園,對遐分開做四條:
2:11 頭一條名叫比遜,就是踅流(se̍h-lâu)佇哈腓拉全地的。佇遐有出金,
2:12 彼位的金是真好;亦出真珠碧玉。
2:13 第二條名叫基訓,就是踅流佇古實全地的。
2:14 第三條名叫希底結(kiat),就是流佇亞述的東勢的。第四條就是伯拉
2:15 耶和華上帝將彼個人下佇伊甸園,來種作顧守。
2:16 耶和華上帝吩咐彼個人講:「園內逐號樹的果子,通隨意來食,
2:17 總是分別好歹的樹,伊的果子呣通食,因為食的日你的確死!」
2:18 耶和華上帝講:「人單身家己住呣好,我欲給伊造一個幫助者來匹配伊。」
2:19 耶和華上帝用土做山野逐樣的走獸以及空中逐樣的飛鳥,導到彼人的面前,看伊欲稱甚麼名。見若伊所稱逐樣活物的,就做彼個物的名。
2:20 彼個人就給一切的精牲及空中的飛鳥、及山野一切的走獸攏號名;總是尋無一個通做彼人的幫助來匹配伊。
2:21 耶和華上帝互彼個人睏重眠,伊就睏;就提伊的脅骨一支,包密伊的肉。
2:22 耶和華上帝就將對彼人所提出的脅骨造成一個查某人,導來就近彼人。
2:23 彼人講:今此個是我骨內的骨,肉內的肉,欲稱做「查某人」,因為伊是對「查甫人」提出。
2:24 所以,人欲離開伊的父母,結聯伊的某,就成做一體。
2:25 翁某二人平平褪腹裼,也無見誚。