創 世 紀

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

32:1 雅各閣行伊的路,上帝的使者抵著伊。
32:2 雅各看見就講:「這是上帝的軍隊」,所以名彼所在叫瑪哈念
32:3 雅各差人代先去西珥的地,以東的田,見伊的兄以掃
32:4 吩咐講:「恁給我的主以掃講:『你的奴僕雅各按呢講:我佇拉班遐寄居,住到今仔日。
32:5 我有牛、驢、羊群、奴僕、女婢,今差人來報我的主,愛得佇你的面前得著恩典。』」
32:6 所差的人倒來雅各遐,講:「阮到你的兄以掃遐,伊抵抵(tú-tú)來欲迎接你,閣有四百人及伊來。」
32:7 雅各大驚閣迫腹,將許個及伊相及佇的人,及羊群、牛群、駱駝分做二隊,
32:8 講:「以掃若來攻擊此隊,剩(chung)的彼隊猶(iáu)通逃走。」
32:9 雅各閣講:「我的祖亞伯拉罕的上帝,我的父以撒的上帝──耶和華啊,你曾對我講:『倒去你的本地本族,我欲好款待你。』
32:10 你對你的奴僕所施一切的慈愛及一切的誠實,就至微細的我也堪得(tit)得著;我前攑我的拐仔過此個約但河,今我已經成做二隊。
32:11 求你救我脫離我的兄以掃的手;因為我驚伊,驚了伊來刣死我及母子。
32:12 你也曾講:『我的確欲好款待你,互你的後裔親像海邊的沙,多到算得。』」
32:13 彼暝,雅各歇佇遐,就佇伊所有的物的內面揀出禮物欲送伊的兄以掃
32:14 山羊母二百隻,山羊牨二十隻,綿羊母二百隻,綿羊牨二十隻,
32:15 駱駝母及食奶的子三十隻,牛母四十隻,牛牨十隻,驢母二十隻,驢子十隻;
32:16 各樣另外一群,交代奴僕,給奴僕講:「恁代先我去,互逐群有相離」;
32:17 閣吩咐做頭的講:「我的兄以掃抵著你的時,若問你講:『你是甚麼人的?欲去叨落?你頭前許個是誰的?』
32:18 你著講:『是你的奴僕雅各的,是欲送我的主以掃的禮物;現在伊本身亦佇阮的後面。』」
32:19 閣吩咐第二、第三,及一切趕歸群精牲的人講:「恁抵著以掃的時亦著照按呢給伊講;
32:20 閣恁亦著講:『你的奴僕雅各佇阮的後面。』」因為雅各家己拍算講:「我用佇我頭前去的禮物來解伊的恨,然後我見著伊的面,豈採伊接納我。」
32:21 對按呢禮物先行;彼暝,雅各歇佇隊中。
32:22 伊暝時起來,導伊二個某,二個女婢,及十一個子,攏過雅博的渡頭,
32:23 代先互過溪,凡所有的亦互過,
32:24 只有剩(chhun)雅各家己佇。有一人來及伊相偃(saⁿ-lán),到佇天昲(phú)光。
32:25 彼人看贏伊,就搧(siàn)雅各的大腿臼(khuū),相偃的時雅各的大腿臼差著。
32:26 彼人講:「天欲光啦,著放我去!」雅各講:「你若無給我祝福,呣放你去。」
32:27 彼人講:「你名做甚麼?」伊講:「我名做雅各。」
32:28 彼人講:「你的名無欲閣叫雅各,欲叫做以色列;因為你及上帝及人鬥(tàu)輸贏,攏得著卡贏。」
32:29 雅各問伊講:「請將你的名給我講。」彼人應講:「乜使(mih-sái)問我的名?」就佇遐給伊祝福。
32:30 雅各名彼所在叫便以利,因為講:「我當頭對面見著上帝,我的生命猶(iáu)得著保全。」
32:31 日抵仔出,雅各經過便以利,伊的大腿已經跛(pái)。
32:32 所以,諸個以色列人無食大腿頭的筋,到佇今仔日,因為彼人搧(siàn)雅各腿臼(khuū)的大筋。