創 世 紀

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

39:1 約瑟互人帶落去埃及。有一個埃及人,是法老的人臣──侍衛長波提法,對許個帶伊來的以實瑪利人的手買去。
39:2 耶和華及伊相及佇啲,互伊逐項亨通,住佇伊的主人埃及人的家。
39:3 伊的主人看見耶和華及伊相及佇啲,閣耶和華互伊的手所做的攏亨通,
39:4 約瑟就佇主人的面前得著恩典,來服事伊,主人設立伊管理伊的家,將一切所有的交伊的手。
39:5 對主人設立伊管理家事及伊一切所有的,耶和華為著約瑟的緣故賜福佇彼個埃及人的家;見若家內及田裡一切所有的攏得著耶和華賜福。
39:6 伊將一切所有的攏交約瑟的手,除去伊所食的物以外,別項所有的攏呣知。約瑟媠閣好生做。
39:7 諸個代誌以後,約瑟的主母注神看伊,講:「來及我睏。」
39:8 約瑟呣趁,對伊的主母講:「你看,家內有甚麼佇我的手,我的主人攏呣知;伊已經將所有的交佇我的手。
39:9 佇此家內無一個比我卡大;你以外,伊無一項無交我,因為你是伊的某。我怎樣通行此個大歹,來得罪上帝?」
39:10 後來伊逐日及約瑟講話,約瑟無聽伊的話,無及伊睏,亦無及伊做堆。
39:11 有一日,約瑟入厝辦伊的代誌,家內的人無一個佇厝內,
39:12 婦仁人就搝(khiú)伊的衫,講:「你來及我睏!」約瑟將衫放佇伊的手,走出去外面。
39:13 婦仁人看見約瑟將衫放佇伊手裡閣走出外面,
39:14 就叫家內的人來,對講:「恁看!伊帶一個希伯來人入來咱的家,欲戲弄咱。伊來我遮,欲及我睏,我就大聲喝。
39:15 伊聽見我出聲喝,就將伊的衫放佇我遮,走出外面。」
39:16 婦仁人將約瑟的衫收佇伊遐,聽候伊的主人倒來,
39:17 就對伊講起諸個事,講:「你所帶來咱遮彼個希伯來的奴僕到我遮欲戲弄我,
39:18 我出聲喝,伊將伊的衫放佇我遮,走出外面。」
39:19 主人聽見伊的某對伊所講的話,講「你的奴僕親像按呢款待我」,伊就受氣,
39:20 約瑟的主人將伊關落監,就是王的罪犯受關的所在。對按呢約瑟佇彼個監內。
39:21 總是耶和華及約瑟佇啲,施恩互伊,互伊佇管監的人的面前得著恩典。
39:22 管監者就將監內所有的犯人攏交約瑟的手;佇遐所做的代誌攏是伊啲做。
39:23 見若約瑟手下的代誌,管監者一概無插(chhap),因為耶和華及約瑟佇啲;閣伊所做的耶和華攏互伊亨通。