創 世 紀

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

41:1 過過二年足足,法老眠夢,夢見伊徛佇河邊,
41:2 看見七隻牛母對河裡起來,媠閣肥,佇蘆竹仔內啲食。
41:3 隨後閣有七隻牛母對河裡起來,怯勢(khiap-sì)閣瘦及前許個牛同徛佇河邊。
41:4 諸個怯勢(khiap-sì)閣瘦的牛母一盡食彼七隻媠閣肥的牛。法老就醒。
41:5 伊閣睏,第二擺眠夢,夢見一欉麥出七穗,博(phauh)閣好。
41:6 後來看見閣出七穗,冇冇(phàⁿ-phàⁿ)閣互東風掃歹。
41:7 諸個冇(phàⁿ)的穗吞彼七穗博(phauh)閣飽滿的。法老醒,才知是夢見。
41:8 到天光,法老心無平安,就差人召埃及所有的術士、博士來;法老就將伊所夢見的給講,無人會給法老圓(oân)。
41:9 彼時酒政長給法老講:「我今仔日記得我的罪。
41:10 前法老受氣人臣,將我及廚房頭關佇侍衛長府內的監。
41:11 我及伊二人像彼暝有夢見,各照伊的夢的意義來夢。
41:12 佇遐及阮佇啲有一個希伯來的少年人,是侍衛長的奴僕,阮給伊講,伊就給阮圓阮的夢,是照阮逐人的夢來圓。
41:13 後來抵抵照伊所給阮圓的來成:伊互我復職,彼人受吊來死。」
41:14 法老就差人去召約瑟就緊緊導伊出監,伊就剪髮,換伊的衫,來見法老。
41:15 法老給約瑟講:「我夢見一個夢,無人會圓伊;我聽見人講到你,聽見夢就會圓。」
41:16 約瑟應法老講:「這呣是在佇我,上帝欲將平安指示法老。」
41:17 法老給約瑟講:「我夢見我徛佇河邊,
41:18 有七隻牛母對河裡起來,肥閣媠,佇蘆竹仔內啲食。
41:19 隨後閣有七隻牛母起來,軟茈(nńg-chíaⁿ)真怯勢(khiap-sì)閣真瘦,遍埃及地,我呣曾看見到即(chiah)歹。。
41:20 諸個瘦閣怯勢(khiap-sì)的牛母一盡食代先彼七隻肥的牛母,
41:21 吞落腹猶未看出有吞落去,彼個怯勢(khiap-sì)的款猶原及代先無各樣。我就醒。
41:22 我佇夢中閣看見一欉麥,出七穗,飽滿閣好,
41:23 後來閣出七穗,枯焦冇冇(phàⁿ- phàⁿ)閣互東風掃歹;
41:24 諸個冇冇的穗吞彼七穗好的。我講互術士聽,也無人會給我解明。」
41:25 約瑟給法老講:「法老的夢就是一個。上帝所欲行的事有指示法老。
41:26 七隻好的牛母是七年,七穗好的亦是七年;夢是一個。
41:27 許個隨後起來的七隻瘦閣怯勢的牛母是七年,許個七穗空冇閣互東風掃歹的亦是七年,欲做七年的飢荒。
41:28 上帝所欲做的事有顯明佇法老,這是我對法老所講的。
41:29 你看,埃及遍地欲抵著大好年冬七年,
41:30 隨後閣欲抵著飢荒七年,甚至佇埃及地攏記得以前的好收,全地欲互飢荒所滅。
41:31 因為以後的飢荒太傷重,就呣知以前地方的好收。
41:32 論到法老二擺的眠夢,是因為上帝註定此個代誌,閣上帝欲緊緊成伊。
41:33 所以,法老著揀一個有聰明有智慧的人,派伊治理埃及地。
41:34 法老著按呢行,閣立官員管理此個地。當七年好年冬的時,埃及地所收的五份抽一份,
41:35 佇將來的好年冬積聚一切的米糧,聚集五穀(kok),收囥(khǹg)照顧,佇逐個城做食物,歸佇法老的手頭。
41:36 所積聚的米糧通做埃及地將來七年飢荒的路用,免得此個地互飢荒所滅。」
41:37 法老及伊一切的人臣攏掠此個代誌做好。
41:38 法老對伊的人臣講:「咱豈會尋著一個親像伊此個人,有上帝的神佇伊的內面嗎?」
41:39 法老對約瑟講:「上帝已經將此個代誌攏指示你,可見無人親像你有此號的聰明智慧。
41:40 你通管理我的家;我的百姓攏著聽你的話互你管理。獨獨佇寶座我比你卡大。」
41:41 法老給約瑟講:「我舉起你管轄埃及全地。」
41:42 法老就剝(pak)伊手裡做印的手指,掛佇約瑟的指頭仔,給伊穿幼苧衫,將金鍊掛佇伊的頷頸,
41:43 閣互約瑟坐伊的第二班車,開道者叫講:「跪。」按呢,法老設立伊治理埃及全地。
41:44 法老對約瑟講:「我是法老,若無你有聲,佇埃及全地,呣准人動腳手。」
41:45 法老欽賜約瑟的名叫撒發那忒巴內亞(Sat-hoat-ná-thek Pa-lōe-a),閣將城的祭司波提非拉的查某子亞西納互伊做某。約瑟就出巡埃及地。
41:46 約瑟埃及王法老的時彼年三十歲。約瑟對法老的面前出去,遍行埃及全地。
41:47 七個好年冬的內面,地的出產極其豐盛,
41:48 約瑟聚集埃及地七個好年冬一切的米糧,將米糧積聚佇逐個城;周圍田地的米糧攏積聚佇伊的本城。
41:49 約瑟積聚五穀極多,親像海邊的沙,到伊停止無算,因為算了。
41:50 飢荒的年未到以前,城的祭司波提非拉的查某子亞西納約瑟生二個子。
41:51 約瑟給大子號名叫瑪拿西,因為伊講:「上帝互我記得我一切的困苦及我的老父的全家。」
41:52 伊給第二子號名以法蓮,因為伊講:「上帝互我佇我受苦的地方興旺。」
41:53 埃及地七年好年冬已經完,
41:54 七年飢荒就來。抵抵照約瑟所講的,逐國攏有飢荒;獨獨埃及全地有米糧。
41:55 埃及全地有飢荒,眾百姓對法老哀求米糧,法老對埃及的眾人講:「恁去尋約瑟,凡若伊所講的,恁攏著做。」
41:56 當時飢荒遍滿天下,約瑟開逐所在的粟倉(chhek-chhng),糶(thiò)米糧互埃及人;佇埃及地飢荒真傷重。
41:57 逐國的人攏去埃及,到約瑟遐糴(thiò)米糧,因為天下飢荒真傷重。