創 世 紀

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

47:1 約瑟入去給法老講:「我的老父及我的兄弟帶的羊群牛群,及一切所有的,對迦南地來,今佇歌珊的地。」
47:2 約瑟對伊的兄弟的中間揀五人,導去見法老。
47:3 法老問約瑟的兄弟講:「恁做甚麼頭路?」給法老講:「你的奴僕本身,及阮的祖公攏是顧羊的人。
47:4 閣給法老講:「迦南地飢荒真傷重,奴僕的羊群無草通食,所以阮來是欲寄腳佇遮。今求你容允你的奴僕踮佇歌珊地。」
47:5 法老給約瑟講:「你的老父及你的兄弟來到你遮,
47:6 埃及地攏佇你的面前,互你的老父及你的兄弟住佇國內第一好的地;通住佇歌珊的地。你若知中間卡有本事的人,就派管顧我的精牲。」
47:7 約瑟導伊的老父雅各入去徛佇法老的面前,雅各就給法老祝福。
47:8 法老問雅各講:「你一生的年日是偌多啊?」
47:9 雅各給法老講:「我寄腳佇世間的年日是一百三十歲,我一生的年日亦少亦艱苦,呣值著我的列祖寄腳佇世間的年日。」
47:10 雅各閣給法老祝福,就對法老的面前出去。
47:11 約瑟照法老的命令,將埃及國第一好的地,就是蘭塞的地,互伊的老父及伊兄弟徛起,做產業。
47:12 約瑟用米糧奉承伊的老父及伊的兄弟,及伊的老父全家,攏照的人額來供給
47:13 飢荒真傷重,全地攏無米糧,甚至埃及地及迦南地的人因為飢荒的緣故餓到昏去。
47:14 約瑟聚集埃及地及迦南地所有的銀,就是糴米糧的銀,約瑟就將許個銀帶到法老的宮。
47:15 埃及地及迦南地的銀攏用了,埃及眾人攏來見約瑟,講:「阮的銀攏用了啦,求你互阮米糧,阮啥事著死佇你的面前?」
47:16 約瑟講:「若是銀用了,恁的精牲通牽來,我為著恁的精牲欲互恁米糧。」
47:17 就將精牲趕到約瑟遐;約瑟就用米糧換的馬、羊群、牛群,及驢;彼年為著換一切的精牲,就用米糧養飼
47:18 彼年已經過,第二年閣來見約瑟,給伊講:「瞞得我的主,阮的銀攏用了,精牲亦攏歸佇我的主。阮佇我的主的面前,除阮的身體及阮的田地以外,無剩一項。
47:19 阮啥事人死,地拋荒佇你的目睭前啊?求你用米糧買阮及阮的地,阮及阮的地做法老的路用。閣用種子互阮,互阮得著活,免死,土地亦免拋荒。」
47:20 對按呢,約瑟為法老買埃及所有的地,埃及人因為互飢荒所迫,逐人攏賣伊的田地;許個地就攏歸佇法老。
47:21 約瑟照諸個城邑(siâⁿ-ip)遷徙埃及的百姓,對埃及此旁到佇彼旁。
47:22 獨獨祭司的地,法老無買伊,因為祭司有對法老得著定著的糧。食法老所互的糧,所以無賣的地。
47:23 約瑟給百姓講:「我今仔日為法老買恁及恁的地,看啊,佇遮有種子互恁,恁通去作田。
47:24 到收成的時,恁著將五份一納互法老,四份歸恁做田裡的種子,亦做恁及恁家內人的食物,以及恁的囝仔的食物。」
47:25 講:「你有救阮的生命。願阮佇我的主的面前得著恩典,阮欲做法老的奴僕。」
47:26 按呢約瑟埃及的地設立定著的例,到佇今仔日:法老得著五份的一份,獨獨祭司的地無歸法老。
47:27 以色列人徛起埃及歌珊的地。佇遐建置產業,閣生湠極其多。
47:28 雅各踮佇埃及地十七年,雅各一生的年日是一百四十七歲。
47:29 以色列死的日近啦,伊就叫伊的子約瑟來,給伊講:「我若佇你的面前得著恩典,請你下手佇我的大腿下,用慈愛及誠實款待我,呣通埋葬我佇埃及
47:30 我及我的父公同睏的時,你著將我帶出埃及,埋葬佇in埋葬的地。」約瑟講:「我欲照你的話來行。」
47:31 雅各講:「你著對我咒誓。」伊就對伊咒誓,對按呢以色列倚床頭敬拜上帝。

回聖經目錄