希 伯 來 書

1 2 3 4 5 6 7 8 9 10 11 12 13

2:1 所以咱著益發致意所聽見的,驚了咱會致到溜去。
2:2 因為對天使所傳的道理尚且是堅固;也見若干犯違逆的代誌攏抵著應該受的報應。
2:3 咱若忽略即呢大的拯救,豈會逃閃嗎?此個拯救既然是主起頭講的,聽見的人干證到實實互咱。
2:4 閣上帝用諸個神蹟、奇事、逐項的權能,及聖神的賞賜,攏照家己的旨意,及相及干證。
2:5 因為阮所講啲來的世界,上帝未曾互伊降服佇天使。
2:6 獨獨有干證佇某所在的講:人是甚麼,互你數念伊?人的子是甚麼,互你看顧伊?
2:7 你互伊略仔卡輸天使,閣用榮光尊貴,互伊做冕旒,閣設立伊佇你的手所造者的頂面,
2:8 互萬物攏降服佇伊的腳下。已經互萬物攏降服伊,就無剩一項物無降服伊。總是到今咱猶未看見萬物攏降服伊。
2:9 獨獨看見彼個略仔卡輸天使的耶穌;為著受死的艱苦,得著榮光尊貴做冕旒,通對上帝的恩,為著眾人受死。
2:10 因為萬物所為著伊、萬物所對伊的,啲導多多子到佇榮光,就互救的首領,對苦難來成完全,本是合宜。
2:11 因為彼個互人成聖的及許個得著成聖的,攏對一個出。所以伊稱做兄弟無掠做見誚,
2:12 講:我欲報揚你的名佇我的兄弟,謳咾你佇會中;
2:13 閣講:我欲倚靠伊;閣講:看啊,我及上帝所互我的子兒。
2:14 今諸個子兒既然相同有血肉的體,伊本身亦平平有,欲用死來廢無有死的權勢的,就是魔鬼,
2:15 亦欲互一生驚畏死到親像做奴才者,攏得著解放。
2:16 因為伊無牽救天使,是牽救亞伯拉罕的後裔。
2:17 所以,凡事伊著及兄弟相同,通佇上帝的事做憐憫忠信的祭司頭,因為百姓的罪獻挽回的祭。
2:18 因為伊已經受苦來抵著試,就會幫助諸個受試的人。

回聖經目錄