希 伯 來 書

1 2 3 4 5 6 7 8 9 10 11 12 13

9:1 今彼個前的約亦有服事的禮儀及屬世間的聖殿。
9:2 因為有備辦會幕,頭前間叫做聖所,彼內面有燈台,及几桌,及排列的餅。
9:3 第二個帳簾後閣有會幕,叫做至聖所,
9:4 遐有金香壇,及整個的包金的約櫃,內面有囥嗎哪的金壺,亞倫發芽的枴仔,及約的石碑二塊;
9:5 櫃頂有榮光的基路兵遮蓋施恩所。此幾項今且免詳細講。
9:6 諸個物已經齊備,祭司常常入頭前間的會幕,盡諸個服事的事。
9:7 若是第二間,只有祭司頭逐年一擺家己入去,無一擺無帶血,為著本身及百姓的錯誤來獻。
9:8 聖神按呢指明,前的會幕猶佇啲的時,入諸個聖所的路猶未顯明。
9:9 這是欲做現今的譬喻,照按呢有啲獻禮物祭祀,就是會互服事的人照良心,來得著完全的。
9:10 為許個,以及飲食及逐等號的洗,不過是做肉體的禮儀,設立來聽候改正的時。
9:11 今基督已經到,做將來諸個好事的祭司頭,經過卡大卡齊全的會幕,呣是人的手所起造,就是無屬佇此世間的;
9:12 伊亦呣是用羊及牛仔的血,就是用家己的血,入聖所一擺就夠額,得著永遠的贖回。
9:13 因為牛羊的血,及牛種仔的灰,灑佇無清氣的人,尚且會互成聖,到佇肉體清氣,
9:14 何況基督對永遠的神,獻家己無瑕疵互上帝,伊的血豈無閣卡會清氣恁的良心,脫離諸個死的所行,來服事真活的上帝啊?
9:15 因為按呢,伊做新約的中保,用死來贖前約的時所犯的罪過,是欲互受召的人得著永遠的業的應允。
9:16 凡若有遺命的確著有遺命的人死的憑據;
9:17 因為已經死,就遺命堅固,遺命的人猶活佇啲,就遺命欲豈有力?
9:18 所以,前的約亦呣是無用血來設立;
9:19 因為摩西已經照律法將攏總的誡命傳互眾百姓,就捧牛仔及羊的血,以及水及朱紅色的綿及牛膝草,來灑彼本冊,及眾百姓,講:
9:20 「此個就是上帝所吩咐恁的約的血。」
9:21 閣亦照按呢用血灑會幕及所用來服事的器具。
9:22 閣照律法,逐項物差不多攏是用血互伊清氣;若無流血,就無赦免。
9:23 照天頂的樣所做諸個物,的確著用諸個互伊清氣;就佇天頂的原物,著用比這卡好的祭互伊清氣。
9:24 因為基督呣是入人的手所造的聖所(做真聖所的影像的),就是入佇真的天,今為著咱諸個顯現佇上帝的面前;
9:25 伊亦免用家己沓沓 (tauh-tauh ) 獻,親像許個祭司頭逐年用牛羊的血入諸個聖所,
9:26 若按呢,就基督對創造世間以來,著沓沓受苦。獨獨今佇諸個世代的路尾,伊一擺出現,獻本身做祭,來除去罪。
9:27 閣照所註定的,人有一擺死,以後有審判。
9:28 按呢,基督已經一擺抵著獻,來擔當多多人的罪過,欲第二擺對向望伊的人出現來救,彼時出現及罪無干涉。

回聖經目錄