雅 各 書

1 2 3 4 5

3:1 我的兄弟啊,呣通多多人做先生,因為知咱欲受卡重的審判。
3:2 因為咱眾人佇多多項跋倒;佇講話無跋倒的,就是做完全的人,也會約束伊通身軀。
3:3 咱下馬咬韁(bé-kā-kiuⁿ)佇馬的嘴,互順趁咱,就管轄通身軀。
3:4 閣你看,許個船雖然許大隻,互大風掃伊,猶原是用細細的舵(tāi),互伊轉越照舵公的意思所愛。
3:5 按呢,舌是細細的體,猶久講大話。你看,小可的火燒樹木偌多啊!
3:6 舌就是火,佇咱百體中做不義的世界,拍垃墋通身軀,一生的行動對伊發火,伊家己的火是對地獄發。
3:7 因為逐類的走獸、飛鳥、蟲(thōa)、水族,攏受制壓,也已經互人類制壓;
3:8 獨獨舌無人會制壓,是無停歇的歹物,有死的毒滿滿。
3:9 咱用伊謳咾主、就是父,閣用伊咒詛人,就是照上帝的款式來創造者。
3:10 謳咾及咒詛像一個嘴出。我的兄弟啊,這是呣應該!
3:11 水泉豈會對像一孔流出甜的苦的嗎?
3:12 我的兄弟啊,無花果樹會生橄欖嗎?抑是葡萄樹會生無花果嗎?按呢對鹹的流出飷(chiáⁿ)的也會。
3:13 恁中間是誰有智慧見識的啊?就著用智慧的溫柔,對好的品行來顯明伊的所行。
3:14 恁心內若囥惡毒的怨妒及相爭,就莫得誇口,莫得白賊來逆真理。
3:15 此號智慧呣是對頂面來的,是屬佇罪,屬佇血氣,屬鬼的款。
3:16 因為佇甚麼所在有怨妒及相爭,就佇遐有擾亂及一切的歹事。
3:17 獨獨對頂面的智慧,一是(it-sī)清潔,猶的(iáu-ê)是和平,溫柔好商量(siong-liông),有憐憫及好的果子滿滿,無偏袒(phian-thán),無假好。
3:18 閣義的果子是在佇和平,給行(kā-kiâⁿ)和平的人來種。

回聖經目錄