雅 各 書

1 2 3 4 5

5:1 今,恁富人,著為著欲到佇恁的苦難,來啼哭、喉叫。
5:2 恁的錢財已經敗壞,恁的衣裳(i-chiûⁿ)著蛀(chiù)蟲。
5:3 恁的金銀生銹(sian);彼個銹欲做干證來攻擊恁,也欲食恁的肉,親像火燒。恁佇諸個路尾日已經積聚財寶。
5:4 你看,收割恁的園者的工錢,恁所呣互來剋虧人的,有聲啲喉叫,閣收割的人諸個哀怨的聲透入萬軍的主的耳孔。
5:5 恁佇地上曾宴樂、奢侈(chhia-chhí),養恁的心佇殺戮(sat-lio̍k)的日。
5:6 彼個義人恁曾定伊的罪,來刣死伊,伊也無抵敵恁。
5:7 兄弟啊,所以恁著常常吞愞,到佇主的降落。你看,作穡(sit)人聽候地上寶貝的土產,常常吞愞啲聽候伊到得著秋霖春雨(chhiu-lîm-chhun-hō.)。
5:8 恁也著常常吞愞,堅固恁的心,因為主的降臨近啦。
5:9 兄弟啊,莫得相怨妒,免得恁受審判。你看,審判司已經徛佇門口。
5:10 兄弟啊,許個託主的名來講的先知,恁著取做受患難吞愞的模樣。
5:11 許個曾吞愞的人,咱講有福氣。恁曾聽見約伯的吞愞,閣看主到尾怎樣,就是主滿腹的慈悲及憐憫。
5:12 獨獨我的兄弟啊,第一要緊,莫得咒誓;莫得指天,抑是地,抑是別項物來咒誓。恁的,是,著做是;呣是,做呣是,免得恁抵著擬罪。
5:13 恁中間有人受苦嗎?伊著祈禱;有人歡喜無?伊著吟詩。
5:14 有人破病無?伊著叫教會的長老;佇主的名用油抹伊,近倚伊來祈禱。
5:15 有信的祈禱欲救破病的人,主欲互伊起來;伊若有罪,欲赦免伊。
5:16 恁著相對認罪,相替祈禱,通得著醫好。義人的祈禱,伊的力量有大功效。
5:17 以利亞是及咱同情的人,伊切切求莫得落雨,就無落雨佇地裡歷過三年閣六月日。
5:18 伊閣祈禱,天就落雨,地就出土產。
5:19 我的兄弟啊,恁中間若有失迷真理的,有人互伊越轉,
5:20 通知互一個罪人對迷路倒轉的,會救伊的靈魂出死,閣會遮蓋多多罪過。