約 翰 福 音

1:1	佇起頭有道，道及上帝相及佇啲，道就是上帝。
1:2	此個道佇起頭及上帝相及佇啲。
1:3	萬物對道來創造；見若受創造的，無一項呣是對伊來創造。
1:4	活命佇伊的內面，此個活命是人的光。
1:5	光照佇黑暗，黑暗無接納伊。
1:6	有一人，對上帝差來，名叫約翰。
1:7	此個人來做干證，是欲為著光做干證，互眾人對伊來信。
1:8	伊呣是彼個光，是欲為著光做干證若定。
1:9	有真的光來入世間，啲照萬人。
1:10	伊佇世間，世間對伊來創造，也世間呣識伊。
1:11	伊到家己的所在，也家己的人呣接納伊。
1:12	見若接納伊的，就是信伊的名的人，伊就賞賜有權成做上帝的子兒。
1:13	呣是對血氣，亦呣是對肉體的意思，亦呣是對人的意思生的，就是對上帝。
1:14	道成肉體，徛起佇咱中間，有恩典及真理滿滿。閣阮曾看見伊的榮光，親像獨生的子對父所得的榮光。
1:15	約翰為著伊做干證，叫講：「此個就是我所講：『隨尾我來的，成做我的代先，因為伊本代先我佇啲。』」
1:16	因為對伊的充滿，咱攏有所受，就恩典續接恩典。
1:17	因為律法是對摩西來傳；恩典及真理是對耶穌基督才有。
1:18	未曾有人看見上帝，只有佇父心懷中獨生的子有表明伊。
1:19	約翰的干證記佇下底：猶太人對耶路撒冷差祭司及利未人就近伊來問講：「你是是誰。」
1:20	彼時約翰承認，無隱瞞，伊承認講：「我呣是基督。」
1:21	閣問伊：「這是怎樣？你是以利亞嗎？」伊講：「呣是。」「你是彼個先知嗎？」應講：「呣是。」
1:22	就給伊講：「你是是誰，互阮通回覆差阮的。你著講家己，是怎樣？」
1:23	講：「我就是啲叫佇曠野者的聲講：『修直主的路』，親像先知以賽亞所講的。」
1:24	許個人就是法利賽人所差的；
1:25	閣問伊講：「你若呣是基督，亦呣是以利亞，亦呣是彼個先知，怎樣行洗禮啊？」
1:26	約翰應伊，講：「我是用水行洗禮，有徛佇恁中間的，恁呣識伊，
1:27	伊就是隨尾我來的，就解伊的鞋帶我亦堪得。」
1:28	諸個事行佇約但外的伯大尼，就是約翰行洗禮的所在。
1:29	隔日，約翰看見耶穌就近伊，就講：「你看，上帝的羊羔，就是擔當世間的罪的！
1:30	此個就是我所曾講：『有一人隨尾我來，成做我的代先，因為伊本代先我佇啲。』
1:31	我本呣識伊，獨獨欲互伊顯明佇以色列人，所以我來用水行洗禮。」。
1:32	約翰閣干證講：「我曾看見聖神，親像鴿仔對天降落，歇佇伊頂面。
1:33	我平素呣識伊，獨獨差我用水行洗禮的，給我講：『你看聖神降臨，歇佇伊頂面，伊就是用聖神行洗禮的。』
1:34	我曾看見，來干證此個是上帝的子。」
1:35	閣隔日，約翰及伊二個學生啲徛。
1:36	看見耶穌啲行，就講：「你看上帝的羊羔！」
1:37	彼二個學生聽伊所講，就隨耶穌。
1:38	耶穌越轉身，看啲隨伊，就給講：「恁啲尋甚麼？」給伊講：「拉比，你(tià佇叨落？」（拉比翻譯就是先生。）
1:39	耶穌給講：「恁來就會看見。」就去看伊所住的所在，彼日及伊相及住；彼時約略四點鐘。
1:40	聽約翰的話來隨耶穌的二人，其中一個是西門彼得的兄弟安得烈。
1:41	伊代先抵著兄弟西門，給伊講：「阮已經抵著彌賽亞。」（翻譯就是基督。）
1:42	就導伊就近耶穌。耶穌看伊，講：「你就是約翰的子西門，你欲稱做磯法。」（翻譯就是彼得。）
1:43	閣隔日，耶穌欲去加利利，抵著腓力，就給伊講：「隨我。」
1:44	腓力是伯賽大的人，及安得烈、彼得同城。
1:45	腓力抵著拿但業，就給伊講：「摩西記佇律法及諸個先知所記的，阮已經抵著伊，就是約瑟的子拿撒勒人耶穌。」
1:46	拿但業給伊講：「拿撒勒豈會出甚麼好物嗎？」腓力講：「來看！」
1:47	耶穌看見拿但業就近伊，就指伊講：「你看，真正是以色列人，心無詭譎(khúi-khiat )的。」
1:48	拿但業給伊講：「對叨落識我？」耶穌講：「腓力猶未叫你，你佇無花果樹腳，我已經看見你啦。」
1:49	拿但業應伊講：「拉比，你就是上帝的子，你就是以色列的王！」
1:50	耶穌應伊講：「因為我給你講『我已經看見你佇無花果樹腳』，你就信嗎？你欲看見代誌比諸個卡大的」；
1:51	閣給伊講：「我實實給恁講，恁欲看見天開，上帝的天使上落佇人子的頂面。」