約 翰 福 音

1 2 3 4 5 6 7 8 9 10 11 12 13 14 15 16 17 18 19 20 21

19:1 對按呢彼拉多用鞭拍耶穌。
19:2 兵丁用茦仔(chhì-á)編做冕旒戴佇伊的頭殼,閣用紫色的袍(phàu)給伊穿,
19:3 就近伊,講:「猶太人的王,平安啊!」就搧(siàn)伊。
19:4 彼拉多閣出去外面給講:「你看,我導伊出來互恁,互恁知我查了看伊無罪。」
19:5 耶穌戴茦仔的冕旒,穿紫色的袍,出來外面。彼拉多閣給講:「你看,此個人!」
19:6 諸個祭司頭及差役看見伊,就大聲喉叫講:「釘伊十字架!釘伊十字架!」彼拉多講:「恁家己掠去釘!因為我看伊無罪。」
19:7 猶太人應伊講:「阮有律法,也照此個律法,伊應該死,因為伊掠本身做上帝的子。」
19:8

彼拉多聽見此個話,就益發驚,

19:9 閣入公堂,給耶穌講:「你對叨落來?」若是耶穌無應伊。
19:10 彼拉多就給伊講:「你呣及我講嗎?豈呣知我有權通放你,亦有權通釘你佇十字架嗎?」
19:11 耶穌應伊講:「若呣是對頂面互你,就你無權通辦我。所以,將我交互你的人,伊的罪閣卡重。」
19:12 對按呢,彼拉多愛欲放伊,猶太人大聲喉叫講:「你若放此個人,就呣是該撒的朋友。因為凡若掠家己做王的,是背叛該撒。」
19:13 彼拉多聽見諸個話,就導耶穌出來,也家己坐佇公座,佇一個名叫「舖石( Pho͘-chio̍h )的所在」,希伯來的話叫做勒巴大(Lek-pa-tāi)。
19:14 彼日就是備辦過節的日,約略日中晝。就給猶太人講:「你看,恁的王!」
19:15  大聲喉叫講:「除去!除去!釘伊佇十字架!」彼拉多講:「我將恁的王釘十字架嗎?」諸個祭司頭應講:「該撒以外,阮無王。」
19:16 對按呢就將耶穌交互去釘十字架。
19:17 就收伊。耶穌家己夯伊的十字架出去,到一個名叫「頭殼碗」的所在,希伯來的話叫做各各他
19:18 佇遐釘伊十字架,閣有二人及伊同釘,一旁一個,耶穌佇中央。
19:19

彼拉多亦寫斬條,下佇十字架,寫講:「猶太人的王,拿撒勒人耶穌。」

19:20 猶太人多多讀此個斬條;因為耶穌受釘的所在近城,閣所寫的是用希伯來羅馬希利尼的文字。
19:21 所以猶太人諸個祭司頭給彼拉多講:「莫得寫『猶太人的王』,著寫『伊家己講:我是猶太人的王』。」
19:22 彼拉多應講:「我所寫的,已經寫了啦。」
19:23 兵丁已經釘耶穌佇十字架,就提伊的衫分做四份,逐個兵得著一份;閣提伊的內衫,此領內衫無合叕(kap-choā),是頂下透織(thàu-chit )的。
19:24 所以相及講:「莫得拆裂,著來拈鬮(liam-khau),看是誰得著。」這是欲應驗聖經所講:相及分我的衫,拈鬮(liam-khau)我的衣服。
19:25 兵丁果然做諸個事。徛佇耶穌十字架邊,有伊的老母及伊的老母的姊妹,革流巴的某馬利亞,及抹大拉馬利亞
19:26 耶穌看見老母及所疼的學生徛佇邊頭,就對老母講:「老母啊,看,你的子!」
19:27 閣對學生講:「看,你的老母!」對彼時,彼個學生至接伊到家己的家。
19:28 此個代誌以後,耶穌知眾項事已經明白,因為欲互聖經的話應驗,就講:「我嘴乾。」
19:29 佇遐有一個器具貯醋滿滿,就提海絨(hái-jiông)浸醋,縖牛膝草(gû-chhek-chháu)托(thuh)到伊的嘴。
19:30 耶穌已經受醋(chhò͘),就講:「事明白啦!」就俯(àⁿ)頭氣斷。
19:31 彼時是備辦節的日,猶太人愛免得佇安息日留身屍佇十字架,因為此個安息日是大的日,所以求彼拉多教人摃折(kòng-chi̍h)的腳骨,來收
19:32 兵丁到,摃折頭一個的腳骨,以及彼個及伊同釘者的腳骨。
19:33 到佇耶穌,看見伊已經死,就無摃折伊的腳骨。
19:34 獨獨有一個兵用槍鑿(chha̍k)伊的脅(ê-hia̍p)下,血及水連鞭流出。
19:35 看見的人做干證──伊的干證是真,家己知所講是實──互恁亦會信。
19:36 因為諸個代誌成,是欲應驗聖經所講:「伊的骨無一支欲受拍碎。」
19:37 閣聖經有一句講:「人欲看所鑿(chha̍k)的。」
19:38 諸個代誌以後,有亞利馬太約瑟,是耶穌的學生,獨獨驚猶太人,才暗靜做學生。伊來求彼拉多,准伊去收耶穌的身屍。彼拉多允准,就來收伊的身屍去。
19:39 閣有尼哥底某,起頭曾暝時就近耶穌的亦來,帶沒藥(bu̍t-io̍h)摶(chhiau)沈香(tîm-hiuⁿ)約略一百斤。
19:40 就收耶穌的身屍,用幼苧布(iù-toē pò͘)及香料包伊,照猶太人埋葬的例。
19:41 釘十字架的所在有園,園內有新的墓,攏未曾有人葬的。
19:42 彼日是猶太人備辦節的日,閣因為彼個墓近,所以安置耶穌佇遐。


回聖經目錄