章 | 1 2 3 4 5 6 7 8 9 10 11 12 13 14 15 16 17 18 19 20 21 |
20:1 | 七日的頭一日清早,天猶未光,抹大拉的馬利亞到墓,看見石已經對墓徙(soá)開, |
20:2 | 就走去就近西門彼得及別個學生,就是耶穌所疼彼個,給講:「有人將主移出墓,阮呣知下佇叨落。」 |
20:3 | 所以彼得及彼個別個學生出去,到墓。 |
20:4 | 二人平平走,彼個別個學生走做頭比彼得卡緊,代先到墓, |
20:5 | 俯落看墓內,看見幼苧布下啲,獨獨無入去。 |
20:6 | 西門彼得隨後到,入墓,看見幼苧布下啲, |
20:7 | 閣看見包頭殼的巾無及幼苧布做一位,是另外佇一所在捲啲。 |
20:8 | 彼時彼個代先到墓的學生亦入去,看見就信。( |
20:9 | 因為猶未明白聖經的話,講伊的確著對死人中復活。) |
20:10 | 對按呢二個學生倒去家己的家。 |
20:11 | 獨獨馬利亞徛佇墓外啲啼哭。哭的時,俯落看墓內, |
20:12 | 看見二個天使,穿白衫,坐佇耶穌的身屍所曾安置的所在,一個佇頭,一個佇腳。 |
20:13 | 就給伊講:「婦仁人啊,啥事哭?」應伊講:「因為人將我的主移去,我呣知下伊佇甚麼所在。」 |
20:14 | 已經講諸個話,就翻身向後面,看見耶穌啲徛(khiā),也呣知伊是耶穌。 |
20:15 | 耶穌給伊講:「婦仁人啊,啥事啼哭?你尋是誰?」馬利亞拍算伊是顧園的,就給伊講:「頭家啊,你若有扛伊去,請給我講,下伊佇甚麼所在,我就去收伊。」 |
20:16 | 耶穌給伊講:「馬利亞啊!」伊就越轉身,用希伯來的話給伊講:「拉波尼!」(意思就是先生。) |
20:17 | 耶穌給伊講:「莫得摸我,因為我猶未上去見父。你著去尋我的兄弟,給講,我上去見我的父,亦是恁的父,見我的上帝,亦是恁的上帝。」 |
20:18 | 抹大拉的馬利亞就去給學生講:「我已經看見主。」閣講主用諸個話給伊講。 |
20:19 | 彼日(就是七日的頭一日)已經暗,學生因為驚猶太人,就佇所住的所在關門。耶穌到,徛佇中間,給講:「願恁平安!」 |
20:20 | 已經講此個話,就用手及脅下( hia̍p-ē)互看。學生看見主,就歡喜。 |
20:21 | 耶穌閣給講:「願恁平安!我差恁,親像父有差我。」 |
20:22 | 已經講此個話,就對歕(pûn)氣,講:「恁受聖神! |
20:23 | 恁赦甚麼人的罪,就赦去,留甚麼人的罪,就留啲。」 |
20:24 | 有多馬稱做低土馬的,是十二學生的一個;耶穌到的時,伊無相及佇啲。 |
20:25 | 其餘的學生就給伊講:「阮諸個已經看見主啦。」若是多馬給講:「我若無看見伊手中釘的跡( jiah),無用我的指頭仔探伊釘的跡,無用我的手探伊的脅下,我決斷呣信。」 |
20:26 | 過八日,伊的學生閣再佇厝內,多馬亦佇啲,門已經關。耶穌到,徛佇中央講:「願恁平安!」 |
20:27 | 就給多馬講:「伸你的指頭仔來,看我的手;伸你的手,探我的脅下。莫得做呣信的,著做信的!」 |
20:28 | 多馬應講:「我的主啊!我的上帝啊!」 |
20:29 | 耶穌給伊講:「你因為看見我才信;許個無看見來信的人,有福氣。」 |
20:30 | 耶穌佇學生的面前閣有行多多神蹟,無記佇此本冊的。 |
20:31 | 獨獨記諸個互恁信耶穌是基督,是上帝的子,信就佇伊的名得著活。 |