約 翰 福 音

1 2 3 4 5 6 7 8 9 10 11 12 13 14 15 16 17 18 19 20 21

8:1 逐人就倒去兜;耶穌去橄欖山,
8:2 透早閣到佇殿裡。百姓攏就近伊,伊就坐啲,來教示
8:3 經學士及法利賽人帶一個婦仁人來,是佇行姦淫的時互人掠著的,已經互伊徛佇中央(tiong-ng),
8:4 就對耶穌講:「先生,此個婦仁人是抵抵行姦淫的時互人掠著。
8:5 摩西佇律法命令阮用石頭擲死此號的婦仁人。今你講怎樣?」
8:6 講按呢,是欲試耶穌,愛得著有縫通(phāng-thang)告伊。耶穌就俯腰(àⁿ-io),用指頭仔寫字佇土腳。
8:7 猶原問伊無息,耶穌就挺身(thêng-sin )起來,對講:「恁中間無罪的人,通代先用石頭擲伊。」
8:8 就閣俯腰,用指頭仔寫字佇土腳。
8:9 聽了,對老到少年,一個一個攏出去,只有耶穌家己佇啲,婦仁人猶原徛佇中央。
8:10 耶穌挺身起來,給伊講:「婦仁人啊,佇叨落?無人定你的罪嗎?」
8:11 伊講:「主啊,無。」耶穌講:「我亦無定你的罪。去啊,今以後莫得閣犯罪!」
8:12 耶穌閣給眾人講:「我是世間的光。隨我的人,無行佇暗,反轉欲有活命的光。」
8:13  法利賽人就給伊講:「你為著本身做干證,你的干證呣是真。」
8:14 耶穌應講:「我雖罔為著本身做干證,我的干證亦是真;因為我知本身對叨落來,對叨落去;恁呣知我對叨落來,對叨落去。
8:15 恁照肉體擬斷人,我無擬斷人。
8:16 我就若擬斷,我的擬斷是真;因為我呣是家己佇啲,是我及差我的父相及佇啲。
8:17 閣佇恁的律法有記載:『二人的干證就是真。』
8:18 我是為著家己做干證,差我的父亦為著我干證。」
8:19 就給伊講:「你的父佇叨落?」耶穌應講:「恁呣識我,亦呣識我的父;恁若識我,就亦識我的父。」
8:20 耶穌佇殿裡教示人,佇庫房內講諸個話,亦無人掠伊,因為伊的時猶未到。
8:21 耶穌閣給講:「我欲去啦,恁欲尋我,亦欲死佇恁的罪。我去的所在,恁會到。」
8:22 猶太人就講:「伊講『我去的所在,恁會到』,豈是欲自盡嗎?」
8:23 耶穌給講:「恁是對下面,我是對頂面;恁是對此世間,我呣是對此世間。
8:24 所以我有給恁講,恁欲死佇恁的罪。因為恁若呣信我是伊,就恁欲死佇恁的罪。」
8:25 就給伊講:「你是是誰?」耶穌給講:「就是我對起頭所給恁講的。
8:26 我有多多項欲議論恁,欲判斷恁;獨獨差我的是真,我所對伊聽見的,就傳互世間。」
8:27 呣知伊所對講的是指父。
8:28 耶穌就講:「恁舉起人子的時,就知我是伊,亦我所行的無一項對家己。是照父所教示我的來講諸個。
8:29 差我的及我佇啲,伊無放我家己佇啲,因為我常常行伊所歡喜的。」
8:30 當耶穌講諸個話的時,多多人信伊。
8:31 耶穌就對信伊的猶太人講:「恁若常常佇我的道理,就真正是我的學生;
8:32 恁欲識真理,亦真理欲互恁自由。」
8:33 應伊講:「阮諸個是亞伯拉罕的後裔,從來未曾做人的奴才。你怎樣講『恁欲得著自由』啊?」
8:34 耶穌應講:「我實實給恁講,見若犯罪的就是罪的奴才。
8:35 奴才無永永住佇家內;子(kiáⁿ)就永永住。
8:36 所以子若互恁自由,恁就真正自由。
8:37 我知恁是亞伯拉罕的後裔,獨獨恁愛欲刣我,因為我的道理無存佇恁的心。
8:38 我對我的父看見的,我就講伊;恁對恁的父聽見的,恁就行伊。」
8:39 應伊講:「阮的父就是亞伯拉罕。」耶穌給講:「恁若是亞伯拉罕的子,就欲行亞伯拉罕的所行。
8:40 今我是將我對上帝所聽的真理來給恁講的人,亦恁愛欲刣我,這呣是亞伯拉罕的所行。
8:41 恁是行恁的父的所行。」給伊講:「阮呣是對姦淫來生;阮有一個父,就是上帝。」
8:42 耶穌給講:「若是上帝做恁的父,恁就疼我;因為我是對上帝出,亦來到遮,呣是自專( chū-coan)來,是伊差我。
8:43 恁無明我的話是怎樣?是因為恁會聽我的道理。
8:44 恁所對伊出的父就是魔鬼,恁的父的私慾恁愛欲行伊。伊對起頭做刣人的,無徛住佇真理,因為伊內面無真理。伊講白賊的時就是對家己所有的來講;因為伊是白賊的,亦做白賊的父。
8:45 因為我講真理,恁呣信我。
8:46 恁中間是誰擬我有罪?我若講真理,恁啥事呣信我?
8:47 對上帝出的,聽上帝的話;恁所以呣聽,因為恁呣是對上帝出。」
8:48 猶太人應伊講:「阮講你是撒瑪利亞人,閣患著鬼,豈無真著(chin-tio̍h?)?」
8:49 耶穌應講:「我呣是患著鬼;我是尊敬我的父,若是恁侮慢我。
8:50 我無求家己的榮光,有一個啲替我求閣審判的。
8:51 我實實給恁講,人若守我的道理,就永遠無見著死。」
8:52 猶太人給伊講:「今阮知你是患著鬼。亞伯拉罕死,諸個先知亦死,若是你講:『人若守我的道理,就永遠無死。』
8:53 你豈比阮的祖亞伯拉罕卡大嗎?伊已經死,諸個先知亦死,你家己算做甚麼人啊?」
8:54 耶穌應講:「我若榮光家己,我的榮光就呣上算(chiūⁿ-sǹg);榮光我的是我的父,就是恁所講做恁的上帝者。
8:55 恁呣識伊;獨獨我識伊。我若講呣識伊,就我是白賊親像恁;獨獨我識伊,亦守伊的道理。
8:56 恁的祖亞伯拉罕極歡喜,是欲看見我的日子,看見就歡喜。」
8:57 猶太人就對伊講:「你未上五十歲豈曾看見亞伯拉罕嗎?」
8:58 耶穌給講:「我實實給恁講,未有亞伯拉罕我就佇啲。」
8:59 就提石頭欲擲(tìm)伊;若是耶穌家己隱密,對殿堂出去。

回聖經目錄