約 翰 福 音

1 2 3 4 5 6 7 8 9 10 11 12 13 14 15 16 17 18 19 20 21

9:1 耶穌行過的時,看見一人出世就睛暝。
9:2 伊的學生問伊講:「拉比,此人出世就睛暝,對是誰犯罪?是伊本身?抑是伊的父母啊?」
9:3 耶穌應講:「此人無犯罪,伊的父母亦無,獨獨欲用伊來顯明上帝的所做。
9:4 時猶(iáu)是日時(ji̍t-sî),咱著做差我者的工;暝時欲到,彼霎就無人會做工。
9:5 我佇世間的時,是世間的光。」
9:6 諸個話講了,就呸涎佇土腳,用涎攪土,用土糊睛暝人的目睭,
9:7 給伊講:「去洗佇西羅亞的池(西羅亞翻譯就是奉差)。」伊就去洗,倒轉來已經會看見。
9:8 伊的厝邊及平素看見伊做乞食的,講:「此人豈呣是坐啲來求乞的嗎?」
9:9 有人講:「就是伊」;有人講:「呣是,是親像伊若定。」,伊家己講:「我就是。」
9:10 就給伊講:「你的目睭怎樣得著開?」
9:11 伊應講:「彼個名叫耶穌的,攪土糊我的目睭,給我講:『去西羅亞洗。』我隨時去洗,就得著看見。」
9:12 就給伊講:「彼人佇叨落?」伊講:「我呣知。」
9:13 導彼個平素睛暝的去見法利賽人。
9:14 耶穌攪土來開伊的目睭的日是安息日。
9:15 所以法利賽人亦問伊是怎樣得著看見。伊就給講:「伊將土糜(thô͘-bê )下佇我的目睭,我去洗,就看見。」
9:16 法利賽人中有的講:「此人無守安息日,呣是對上帝來。」有的講:「有罪的人豈會行此號神蹟啊?」對按呢分旁。
9:17 閣給睛暝人講:「伊已經開你的目睭,你講伊是甚麼號人?」伊講:「是先知人。」
9:18 猶太人呣信伊平素睛暝,會閣看見,到叫得著看見者的父母來,
9:19 就問講:「此個是恁的子,就是恁所講出世睛暝的嗎?今伊怎樣會看見?」
9:20 伊的父母應講:「伊是阮的子,出世睛暝,阮知。
9:21 今伊怎樣得著看見,阮呣知;是誰開伊的目睭,阮亦呣知。伊大漢啦,問伊,伊欲家己講。」
9:22 伊的父母講按呢,是因為驚猶太人;因為猶太人已經有定約,若有認耶穌做基督的,著革出(kek-chhut )會堂。
9:23 所以伊的父母講:「伊大漢啦,通問伊。」
9:24 就閣叫平素睛暝者,給伊講:「著歸榮光上帝,阮知此人是有罪的人。」
9:25 伊就應講:「伊是有罪的人抑呣是,我呣知;只有知一項,就是我前睛暝,現今會看見。」
9:26 就給伊講:「伊給你做甚麼?按怎樣開你的目睭?」
9:27 應講:「我已經給恁講,恁呣聽,啥事愛閣聽?豈是恁亦愛做伊的學生嗎?」
9:28 就罵伊講:「你就是伊的學生;阮是摩西的學生。
9:29 上帝有對摩西講話是阮所知;獨獨此人,阮呣知伊對叨落來!」
9:30 彼人應講:「這就奇啦!伊開我的目睭,亦恁呣知伊對叨落來。
9:31 咱知上帝無聽有罪的人,獨獨人若敬拜上帝,來行伊的旨意,伊就聽伊。
9:32 對古早以來,未曾聽見出世晴暝者,有人開伊的目睭。
9:33 此人若呣是對上帝來,就無所會做( bô-só-oē-choè)。」
9:34 就應伊講:「你全然出世佇罪惡中,反轉教示阮嗎?」就革(kek)伊出。
9:35 耶穌聽見革伊出,後來尋著伊,就講:「你信上帝的子嗎?」
9:36 伊應講:「主啊,伊是是誰,互我信伊?」
9:37 耶穌給伊講:「你曾看見伊,現在及你講話的就是。」
9:38 伊就講:「主啊,我信!」就拜伊。
9:39 耶穌講:「我因為審判臨到此世間,互看見的人,看見;也看見的人,變做睛暝。
9:40 及伊相及佇啲的法利賽人聽見諸個話,就給伊講:「總無阮亦睛暝嗎?」
9:41 耶穌給講:「恁若睛暝,就無罪;今恁講『阮看見』,就恁的罪定定佇啲。」

回聖經目錄