約 伯 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42

1:1 烏斯的地曾有一人名叫約伯;彼人完全閣正直,敬畏上帝,離開諸個歹。
1:2 伊生七個子,三個查某子。
1:3 伊的家業有羊七千,駱駝三千,牛五百對,驢母五百隻,也有多多差用的人。按呢此人佇東方眾人的中間是最第一大。
1:4 伊許個子去設筵席佇逐人的厝照伊的日子,閣差人去請三個姊妹來,及飲食。
1:5 筵席的日已經滿,約伯差人叫來互聖潔。閣透早起來,照眾人的數額獻燒祭;因為約伯講:「豈採我的子有犯罪,心內棄絕上帝。」約伯常常按呢行。
1:6 有一日,上帝的眾子來家己徛佇耶和華的面前,撒但也來佇中間。
1:7 耶和華對撒但講:「你對叨落來?」撒但就應耶和華講:「我佇地上行來行去,遍行佇遐,對遐來。」
1:8 耶和華對撒但講:「你有留心佇我的奴僕約伯嗎?因為地上無人親像伊完全閣正直,敬畏上帝,離開諸個歹。」
1:9 撒但應耶和華講:「約伯敬畏上帝,豈無因端嗎?
1:10 你豈呣是用籬笆圍伊閣圍伊的家,及圍伊四面一切所有的嗎?伊的手所做的你賜福伊;伊的家業也佇地裡加添多多。
1:11 今你若伸你的手磕著伊攏總所有的;伊的確當面棄絕你。」
1:12 耶和華對撒但講:「看啊,伊一切所有的攏佇你的手頭;獨獨呣通下手佇伊的身軀。」撒但就對耶和華的面前出去。
1:13 有一日,約伯的子查某子抵仔佇大兄的家啲食啲飲酒,
1:14 有使者來約伯遐,給伊講:「牛啲犁田,驢母佇邊仔食草,
1:15 示巴的人忽然到,搶伊,用刀刣死許個奴僕;只有我一人走離,來報你。」
1:16 伊猶啲講的時,閣有一個來講:「上帝的火對天降落,燒羊群及許個奴僕來滅;只有我一人走離,來報你。」
1:17 伊猶啲講的時,閣有一個來講:「迦勒底人分做三隊忽然來,拍駱駝來搶伊,續用刀刣死許個奴僕;只有我一人走離,來報你。」
1:18 伊猶啲講的時,閣有一個來,講:「你的子你的查某子佇大兄的家啲食啲飲酒,
1:19 忽然,有大風對曠野吹來,拍厝的四角頭,厝倒壓佇少年人的頂面,就攏死;只有我一人走離,來報你。」
1:20 約伯就起來,拆裂外衫,剃頭,仆佇地裡來拜,
1:21 講:「我褪裼出老母的胎,也欲褪裼倒去遐;耶和華賞賜,耶和華提去。著謳咾耶和華的名。」
1:22 佇這一切的事約伯並無犯罪,也無掠上帝做無合。