利 未 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

11:1 耶和華吩咐摩西亞倫,對講:
11:2 「恁著吩咐以色列人講,佇地上一切走獸中通食的活物就是諸個:
11:3 見若分蹄(pun-tôe)拆叉(thiah-chhe)、反芻(hoan-chháu)的精牲,恁攏通食伊。
11:4 獨獨反芻抑是分蹄的中間呣通食的就是諸個:駱駝──因為反芻(hoan-chháu)、無分蹄(pun-tôe),對佇恁是無清氣;
11:5 沙番(Sa-hoan)──因為有反芻無分蹄,對佇恁是無清氣;
11:6 兔仔──因為有反芻無分蹄,對佇恁是無清氣;
11:7 豬──因為有分蹄拆叉,總是無反芻,對佇恁是無清氣。
11:8 許個肉,恁攏呣通食;死的,恁攏呣通摸,對佇恁是無清氣。
11:9 「水中恁所通食的就是諸個:見若佇水裡、海裡、河裡、有翅有鱗的,攏通食伊。
11:10 見若佇海裡、河裡、水內一切的動物,就是水內一切的活物見若無翅無鱗的,恁攏著掠做可惡(khó-ò͘ⁿ)。
11:11 許個對佇恁是可惡的,恁呣通食伊的肉;死的也著掠做可惡。
11:12 見若水內無翅無鱗的,恁攏著掠做可惡。
11:13 「鳥隻(Chiáu-chiah)的中間恁著掠做可惡的,就是諸個恁呣通食伊,因為是可惡:就是鷹、鴞(hiau)、鵰( tiau)、鵪( ian),
11:14 小鷹及伊的類;
11:15 烏鴉及伊的類;
11:16 鴕鳥、公的鴕鳥、魚鷹、雀鷹(chhiok-eng )及伊的類;
11:17 暗光鳥(àm-kong-chiáu)、鸕鶿( lô͘-chî)、鴣黃(ko͘-n̂g)、
11:18 貓頭鷹(niau-thâu-eng)、鵜鶘(thê-ô)、臭頭鷹(chhàu-thâu-eng)、
11:19 鶴、白鷺鷥及伊的類;戴鵀鳥( tì-kè-chiáu)及蝙蝠(pián-hok)。
11:20 「見若有翅的蟲用四腳行的,恁攏著掠做可惡。
11:21 獨獨有翅的蟲用四腳行的,其中有腳有腿,用來跳佇地裡的,恁也通食伊。
11:22 其中有蝗蟲(hông-thiông)、螞蚱(má-chà)、蟋蟀(sek-sut)及伊的類;蚱蜢及伊的類;諸個恁攏通食伊。
11:23 獨獨見有翅有四腳啲爬的物,恁攏著掠做可惡。
11:24 「對下面諸個攏會互恁無清氣。見若摸著彼個死的,的確無清氣到下昏時。
11:25 見若提著死屍的一塊仔,著洗伊的衣服,的確無清氣到下昏時。
11:26 見若精牲有分蹄無拆叉(thiah-chhe),也無反芻(hoan-chháu)的,對佇恁是無清氣;見若摸的也無清氣。
11:27 見若四腳的獸,其中用腳掌行的,對佇恁是無清氣;摸伊的死屍者,的確無清氣到佇下昏時。
11:28 提伊的死屍者,著洗伊的衣服,的確無清氣到下昏時。諸個對佇恁是無清氣。
11:29 「地上啲爬的物對佇恁無清氣的就是諸個:鼬鼠(iû-chhú)、鼫鼠(se̍k-chhú)、蜥蜴(sek-e̍k)及伊的類;
11:30 壁虎、龍子、守宮(siú-kiong)、蛇醫(siâ-i)、蝘蜓( ián-têng)。
11:31 啲爬的物的中間諸個對佇恁是無清氣的。佇已經死,見若摸伊的,的確無清氣到下昏時。
11:32 其中有死的,磕落佇甚麼物,彼個物就無清氣,無論是柴的器具、抑是衣服、抑是皮、抑是布袋,無論是做甚麼路用的器具,著下佇水裡,的確無清氣到下昏,彼時才清氣。
11:33 有一隻跋(poa̍h)佇磁器(hûi-khì)內,彼內面無論有甚麼,就染無清氣,恁著將此個磁器拍破。
11:34 彼內面一切會食得的食物,染著水的就無清氣,閣彼號器具內會飲得的,也是無清氣。
11:35 許個死屍,若有一塊磕落佇甚麼物件,彼個物件就無清氣,無論是風爐,抑是灶,就著拍破,攏無清氣,也對佇恁是無清氣。
11:36 總是水泉抑是聚集水的池猶原是清氣;若磕著彼個死屍的,就無清氣。
11:37 若佇死屍,有一塊磕落佇欲種的種子,種子猶原清氣。
11:38 若水已經給伊拍(tâm),彼個死屍有一塊磕落佇伊的頂面,彼個種子對佇恁是無清氣。
11:39 「恁所通食的精牲伊若家己死,有人摸著伊的死屍,伊的確無清氣到下昏時;
11:40 有人食彼個死的精牲,著洗伊的衣服,的確無清氣到下昏時;提死的精牲者,也著洗伊的衣服,的確無清氣到下昏時。
11:41 「見若佇地上啲爬(pê)的物是可惡的,攏呣通食。
11:42 見若用腹肚行的及用四腳行的,抑是有多多腳的,就是一切爬佇地上的,恁攏呣通食,因為是可惡的物。
11:43 恁呣通因為甚麼啲爬的物互家己成做可惡,也呣通因為諸個互家己無清氣,致到恁染垃墋。
11:44 因為我是耶和華──恁的上帝;恁著家己聖來成聖,因為我是聖。恁也呣通用佇地上啲爬的物來拍垃墋家己。
11:45 因為我是導恁出埃及地的耶和華,欲做恁的上帝;所以恁著聖,因為我是聖。」
11:46 這是走獸、飛鳥,及水中會振動的活物,以及會爬佇地上的物的規例。
11:47 著分別無清氣的及清氣的,會食得的及食得的活物。

回聖經目錄