利 未 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

18:1 耶和華吩咐摩西講:
18:2 「你著吩咐以色列人,給講:我是耶和華──恁的上帝。
18:3 恁前所埃及,地,彼位的人所行的,恁呣通趁來行,我欲導恁到迦南地,彼位的人所行的恁也呣通趁來行,也呣通照的規例來行。
18:4 恁著趁我的法度,守我的律例,照此個來行。我是耶和華──恁的上帝。
18:5 所以,恁著守我的律例法度;人若行諸個就欲對諸個來活。我是耶和華。
18:6 「恁攏呣通親近骨肉的親,來露現伊的下體(ē-thé.)。我是耶和華。
18:7 呣通露現你的老母的下體,來凌辱你的老父。伊是你的老母,呣通露現伊的下體(ē-thé.)。
18:8 你老父的後某的下體你呣通露現;伊是你的老父的下體。
18:9 你的姊妹,無論是同父者抑是同母者,出世佇家內抑是出世佇家外,攏呣通露現的下體。
18:10 你的後生的查某子,抑是你的查某子的查某子,呣通露現的下體,因為是你本身的下體。
18:11 你老父的後某的查某子,對你的老父生者,是你的小妹,呣通露現伊的下體。
18:12 呣通露現你的姑(ko͘)的下體;伊是你的老父骨肉的親。
18:13 呣通露現你的姨母( î-bú )的下體;伊是你的老母骨肉的親。
18:14 你呣通凌辱(lêng-jio̍k)你的叔伯露現伊的某的下體;伊是你的姆(ḿ)你的嬸(chím)。
18:15 你呣通露現你的媳婦的下體;伊是你的子的某,呣通露現伊的下體。
18:16 呣通露現你的兄弟的某的下體;伊是你的兄弟的下體。
18:17 婦仁人及伊的查某子的下體呣通攏露現,呣通將伊的子的查某子抑是伊的查某子的查某子的下體來露現伊;是骨肉的親,這是真歹。
18:18 某猶佇啲,你呣通另外閣娶伊的姊妹,露現伊的下體,來做伊的對頭。
18:19 「婦仁人經期到,無清氣的時,你呣通近倚伊,來露現伊的下體。
18:20 你呣通及厝邊的某行淫,來拍垃墋家己。
18:21 呣通互你的子兒對火中過去歸互摩洛,也呣通褻瀆你的上帝的名。我就是耶和華。
18:22 呣通及查甫人交合,親像及婦仁人一樣;這是真可惡的代。
18:23 不論甚麼獸呣通及伊交合,來拍垃墋家己。婦仁人也呣通徛佇獸的頭前,及伊交合;這是逆性的代。
18:24 「佇諸個一切的事,恁攏呣通拍垃墋家己;因為我佇恁的面前所趕出的列邦,佇諸個一切有拍垃墋家己;
18:25 地也拍垃墋,所以我辦伊的罪,彼個地也吐出伊徛起的百姓。
18:26 所以,恁著守我的律例,我的法度。諸個一切可惡的事,無論是本地人,抑是寄腳佇恁中間的外人,攏呣通行伊,(
18:27 因為佇恁以前徛起彼個地的人行諸個一切可惡的事,地就拍垃墋,)
18:28 免得恁拍垃墋彼個地的時,地就將恁吐出,親像吐出佇恁以前的百姓一般樣。
18:29 因為見若行諸個一切可惡的事的一項,行伊的人,欲對伊的百姓中剪除伊。
18:30 所以,恁著守我所交代的,免得恁趁許個可惡的風俗,就是佇恁以前的人所常常行的,致到恁對許個拍垃墋家己。我就是耶和華──恁的上帝。」