利 未 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

19:1 耶和華吩咐摩西講:
19:2 「你著吩咐以色列全會對i講:恁著做聖,因為我耶和華──恁的上帝是聖。
19:3 恁逐人攏著孝敬伊的老母伊的老父,也著守我許個安息。我是耶和華──恁的上帝。
19:4 恁呣通偏向偶像,也呣通為家己鑄造上帝。我是耶和華──恁的上帝。
19:5 恁獻謝恩祭互耶和華的時,著獻通得著接納的。
19:6 佇獻的日抑是過日食伊,若有剩到第三日的,著用火燒伊。
19:7 第三日若閣食著,這是通厭惡的,得著接納。
19:8 凡若食伊的人的確著擔當伊的罪過;因為伊褻瀆(siat-to̍k)耶和華的聖物,彼人的確對伊的百姓中受剪除。
19:9 「恁收割田的五穀,田的角頭呣通割到盡,磕落的也呣通拾。
19:10 葡萄園果子呣通挽了了,也呣通拾葡萄所落的果子;著留互喪鄉人及出外的。我是耶和華──恁的上帝。
19:11 「恁呣通偷提,呣通欺騙,大家呣通講白賊。
19:12 恁呣通指我的名濫糝咒誓,來褻瀆你的上帝的名,我就是耶和華。
19:13  「呣通欺負你的厝邊,也呣通搶提伊的物。做工人的工錢,呣通留佇你遐歸暝到天光。
19:14 呣通罵臭耳聾的,也呣通下塞礙的物佇睛暝人的面前,著敬畏你的上帝。我就是耶和華。
19:15 「恁審判,呣通無公道;呣通偏袒喪鄉人,也呣通看重有勢力的人,著照公道審判你的厝邊。
19:16 呣通佇你的百姓的中間四界行誹謗人,也呣通做干證愛害死你的厝邊。我就是耶和華。
19:17 「你呣通心內怨恨你的兄弟;的確著責備你的厝邊,免得為著伊擔當罪。
19:18 呣通報仇,也呣通埋怨你本國的百姓,著疼厝邊親像家己。我就是耶和華。
19:19 「恁著守我的律例。呣通互恁的精牲及無同類的交合;呣通用二樣的種子參插撒佇你的園地,呣通用二樣的料參插做衫穿佇你的身軀。
19:20 「女婢做人定著,猶未受贖、未得著解放,人若及伊行淫,二人著受刑罰,總是呣通互伊死,因為女婢猶未得著自由。
19:21 彼個查甫人著用補過失的祭,就是一隻綿羊kang牽到會幕門口、耶和華的面前,做補過失祭的祭。
19:22 祭司著用補過失祭的羊kang佇耶和華的面前贖伊所犯的罪,伊所犯的罪就得著赦免。
19:23 「恁到迦南地的時,栽種逐樣會食得的果子樹,恁著看彼個果子做親像未受割禮的一樣。三年的久,恁著看許個親像未受割禮的,呣通食
19:24 到第四年所結的果子攏著做聖,用伊來謳咾耶和華。
19:25 到第五年,恁著食伊的果子,通互伊給恁結卡多果子。我是耶和華──恁的上帝。
19:26 「恁呣通食含血的物;呣通用法術,也呣通占卜。
19:27 頭殼的周圍呣通剃,嘴鬚的周圍也呣通髡。
19:28 恁呣通為死人割家己的肉,也呣通刺記號佇身軀。我是耶和華。
19:29 「呣通凌辱你的查某子,互伊做娼妓,驚了地上專專向淫亂,地上滿滿大歹。
19:30 恁著守我許個安息,敬我的聖所。我是耶和華。
19:31 「呣通偏向許個鬼上身的及行邪術的;也呣通去問,致到互拍垃墋。我是耶和華──恁的上帝。
19:32 「佇白頭毛的人的面前,你著起來徛;也著尊敬老人的面,閣著敬畏你的上帝。我是耶和華。
19:33 「若有出外人寄腳佇恁的地方及恁徛起,就呣通欺負
19:34 及恁徛起的出外人,恁著看親像本地人一樣,也著疼親像本身,因為恁也曾佇埃及地做出外人。我是耶和華──恁的上帝。
19:35 「恁審判,呣通無公道;佇尺、佇秤、佇斗、攏著公道。
19:36 著用公道的秤、公道的鉈子、公道的伊法、公道的欣。我是耶和華──恁的上帝,曾導恁出埃及地的。
19:37 恁著守我一切的律例及我一切的法度來行伊。我是耶和華。」