利 未 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

2:1 「若有人獻素祭做禮物互耶和華,著用幼的麵粉做伊的禮物著斟油佇彼頂面,下乳香佇彼頂面,
2:2 帶到亞倫的子孫做祭司者遐;伊就對幼的麵粉中取出一把來,及淡薄油以及攏總的乳香,祭司就燒伊佇壇頂做紀念,是獻互耶和華做芳芳的火祭。
2:3 素祭所剩的著歸互亞倫及伊的子孫;這是獻互耶和華火祭中做至聖的。
2:4 「你若帶火爐所煏(penk)的禮物做素祭,著用幼麵粉的無酵餅用油調和的,抑是無酵的薄餅用油抹的。
2:5 若用煎盤煎的禮物做素祭,就著用調和油無酵的幼麵粉,
2:6 著擘歸塊,斟油佇頂面;這是素祭。
2:7 若用鼎仔煮的禮物做素祭,就著用油及幼麵粉做。
2:8 著將諸個物做素祭帶到耶和華的面前,交代祭司,互伊帶到壇前。
2:9 祭司著對素祭中提出做紀念的,燒佇壇頂,是獻互耶和華做芳芳的火祭。
2:10 素祭所剩的著歸互亞倫及伊的子孫。這是獻互耶和華的火祭中做至聖的。
2:11 「見若恁獻互耶和華的素祭攏呣通用酵做伊;因為酵及蜜恁攏呣通燒伊來做火祭獻互耶和華。
2:12 諸個物恁著獻互耶和華做起頭熟的禮物,總是呣通上壇頂做芳味。
2:13 見若獻做素祭的禮物攏著用鹽調和,佇你素祭的頂面呣通欠缺恁的上帝立約的鹽。你一切的禮物攏著配鹽來獻。
2:14 若用起頭成熟的物做素祭獻互耶和華做禮物,著用新的穗,就是過碖過烘的好五穀,獻伊做恁起頭成熟的素祭。
2:15 也著斟油佇彼頂面,下乳香佇彼頂面;這是素祭。
2:16 祭司著將彼中間做紀念的,就是過碖的穗一份及油一份,以及一切的乳香,攏燒伊,這是獻互耶和華的火祭。」

回聖經目錄