利 未 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

22:1 耶和華吩咐摩西講:
22:2 「你著給亞倫及伊許個子講:著離開以色列人所分別做聖、歸互我的聖物,免得褻瀆我的聖名。我是耶和華。
22:3 著給講:恁代代的後裔,見若身軀有污穢、來親近以色列人所分別做聖、歸互耶和華做聖物的,彼人著佇我的面前剪除。我是耶和華。
22:4 亞倫的後裔,見若有癩的,抑是下痟的,呣通食聖物,著聽候伊清氣。無論甚麼人摸著彼個對死屍染著垃墋的物,抑是精(tūi-cheng)的人,
22:5 抑是摸著甚麼無清氣會爬的物,抑是摸著許個互伊無清氣的人(不管彼人有甚麼無清氣),
22:6 摸著許個的人,的確無清氣到下昏;若無用水洗身軀,就呣通食聖的物,
22:7 日落的時,伊就清氣,然後通食聖物,因為這是伊的食物。
22:8 家己死的抑是互野獸拆裂的,伊呣通食,因為此個拍垃墋家己。我是耶和華。
22:9 所以著守我所交代的,免得褻瀆伊,對按呢擔當罪來死。我是互成聖的耶和華。
22:10 「一切的外人呣通食聖物;歇佇祭司的家者,抑是做工人,攏呣通食聖物;
22:11 設使祭司買人,是伊用銀買的,彼人通食伊;出世佇伊的家者也通食伊的米糧。
22:12 祭司的查某子若嫁出外人,就呣通食所舉起來的聖物。
22:13 總是祭司的查某子若是寡婦,抑是受離出者,無子兒,閣倒來老父的家,及伊少年的時一樣,就通食伊的老父的食物;獨獨外人呣通食。
22:14 若有人無張持食聖物,著照許個聖物加五份一交互祭司。
22:15 呣通褻瀆以色列人所獻互耶和華的聖物,
22:16 免得佇食聖物的時擔當過失的罪過,因為我是互成聖的耶和華。」
22:17 耶和華吩咐摩西講:
22:18 「你著吩咐亞倫及伊許個子,及以色列的眾人對講:以色列家的人,抑是佇以色列中寄腳的,見若獻禮物,無論是所下的願,抑是甘心獻的,就是獻互耶和華做燒祭的,
22:19 就著獻牛,抑是綿羊,抑是山羊,攏著用公的無瑕疵的,才會得著歡喜接納。
22:20 見若有瑕疵的,恁呣通獻,因為這無欲給恁接納。
22:21 見若對牛群抑是羊群中,將謝恩祭獻互耶和華,為著欲謝特別下的願,抑是做甘心獻的,所獻著的著純全無瑕疵才會得著接納。
22:22 睛暝的、著傷的,破相的、生瘤的、生瘡的、生癬的諸個攏呣通獻互耶和華,也呣通佇壇頂獻互耶和華做火祭。
22:23 無論是牛牨抑是羊仔,若是肢體有加,抑是有減的,彼號通做甘心祭來獻;總是用伊來謝願,就得著接納。
22:24 外腎損傷的,抑是壓碎的,抑是破裂的,抑是閹的,呣通獻互耶和華,佇恁的土地也呣通按呢行。
22:25 此號的物,恁也呣通對外國人的手,接受獻做恁上帝的食物;因為此號物攏有毀壞,有瑕疵的,通給恁接納。」
22:26 耶和華吩咐摩西講:
22:27 「牛抑是綿羊,抑是山羊已經生,七日隨伊的母;對第八日以後,通做耶和華火祭的禮物,得著接納。
22:28 無論牛母抑是羊母,你呣通像(siang)日刣母及子。
22:29 恁獻謝恩祭互耶和華,著獻通得著接納的。
22:30 著就彼日食伊,呣通留一點仔到過早起。我是耶和華。
22:31 「所以恁著守我諸個誡命來行伊。我是耶和華。
22:32 恁呣通褻瀆我的聖名;因為我佇以色列人的中間,欲受尊來做聖。我是互恁成聖的耶和華,
22:33 導恁出埃及地,做恁的上帝的。我是耶和華。」

回聖經目錄