利 未 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

24:1 耶和華吩咐摩西講:
24:2 「著命令以色列人,用橄欖夾成清的油提來互你,通點燈互伊常常光。
24:3 佇會幕內法櫃(hoat-kūi )的帳簾( tiùⁿ-lî)外,亞倫著料理伊對下昏到早起常常佇耶和華的面前。這是做恁代代永遠的例。
24:4 伊著佇耶和華的面前,常常料理諸個燈佇清氣的燈台頂。」
24:5 「你著提幼的麵粉,煏(pek)十二塊餅,每塊用伊法十分二。
24:6 著將餅排做二叕(choā),每叕六塊佇耶和華的面前聖潔的桌頂;
24:7 閣著用清氣的乳香下佇逐叕(choā),給餅做記號,就是做火祭獻互耶和華。
24:8 逐個安息日伊著常常排佇耶和華的面前;這是為著以色列人做永遠的約。
24:9 諸個餅著歸互亞倫及伊的子孫;著佇聖的所在食伊,因為佇耶和華的火祭中,此個是至聖歸佇伊做永遠的例。」
24:10 有一人伊的老母是以色列人,伊的老父是埃及人,出來行佇以色列人的中間。此個以色列婦仁人的子及一個以色列人佇營盤內冤家。
24:11 此個以色列婦仁人的子褻瀆聖名,閣咒詛,就有人將伊帶到摩西遐。(伊的老母名叫示羅密,是的支派底伯利的查某子。)
24:12  關伊佇拘留所,欲聽候耶和華指示。
24:13 耶和華吩咐摩西講:
24:14 「著將彼個咒詛的人帶到營外。互聽見的人按手佇伊的頭殼頂;全會眾人著用石頭擲死伊。
24:15 你著吩咐以色列人講:見若咒詛伊的上帝的,著擔當伊的罪。
24:16 人褻瀆(siat-to̍k)耶和華的名,著互伊死;全會的眾人著用石頭擲死伊。不管是出外人抑是本地人,伊褻瀆耶和華的名的時,著互伊死。
24:17 見若拍死人的,的確著互伊死;
24:18 拍死精牲的,著賠伊,用命賠命。
24:19 人若互伊的厝邊受損傷(sún-siong),伊按呢行,也著按呢款待伊:
24:20 用傷賠傷,用目睭賠目睭,用嘴齒賠嘴齒。伊損傷人怎樣,也著按呢辦伊。
24:21 拍死精牲的,著賠伊;拍死人的,的確著互伊死。
24:22 不管是出外人抑是本地人,同一樣的法律。因為我耶和華──是恁的上帝。」
24:23 摩西就給以色列人講,就將彼個咒詛的人帶到營外,用石頭擲死。以色列人就照耶和華所命令摩西的來行。

回聖經目錄