利 未 記

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

27:1 耶和華吩咐摩西講:
27:2 「你著吩咐以色列人講:用人下特別的願,著照你所估的身價歸互耶和華。
27:3 你所估的價,查甫人對二十歲到六十歲,著估伊的價銀五十舍客勒,照聖所的舍客勒。
27:4 若是查某人,你著估伊的價三十舍客勒。
27:5 若是對五歲到二十歲,查甫的你著估伊的價二十舍客勒,查某人估十舍客勒。
27:6 若是對滿月到五歲,查甫的你著估價銀五舍客勒,查某的著估價銀三舍客勒。
27:7 若是對六十歲以上,查甫人你著估價銀十五舍客勒,查某人十舍客勒。
27:8 彼人若喪鄉,照你所估的價,就著互伊徛佇祭司的面前祭司著估伊,照下願的人的氣力,祭司著估伊。
27:9 「若是精牲,就是人獻互耶和華做禮物的,攏著分別伊做聖。
27:10 人呣通改換,也呣通對換,或是用好的換歹的,抑是用歹的換好的。若用精牲對換精牲,所下的及所換的攏著分別伊做聖。
27:11 若無清氣的精牲,人所呣通獻互耶和華做禮物的,就著互精牲徛佇祭司的面前。
27:12 祭司就著估伊的價;精牲是好是歹,你祭司所估的按呢就是。
27:13 伊若一定欲贖回,就著佇你所估的價錢以外加添五份的一份。
27:14 「人用厝分別做聖,歸互耶和華,祭司就著估伊的價。厝是好是歹,祭司所估的價,照按呢定著。
27:15 分別伊的厝做聖的,若欲贖回,就著佇你所估的價銀以外加添五份的一份,厝照舊歸伊。
27:16 「人若對伊的業的地分別一份做聖,歸互耶和華,你著照伊撒種的多少估伊的價,若撒大麥一俄梅珥(hō-mûi-jíⁿ),價銀著五十舍客勒。
27:17 伊若對禧年起將地分別做聖,就著照你所估的價錢來定著。
27:18 設使伊佇禧年以後將地分別做聖,祭司就著對彼霎到禧年所剩的年額算伊的價錢,也著對你所估的來減少伊。
27:19 分別伊的地做聖的若一定欲贖回,伊就著佇你所估的價錢以外加添五份的一份,地就定著歸伊。
27:20 伊若呣贖回彼個地,抑是將地賣互別人,就會閣贖得。
27:21 彼個地到禧年的時已經交出,著做聖歸互耶和華,親像永遠獻的地一樣,著歸互祭司做業。
27:22 伊若將所買的一塊地,呣是伊產業的地,分別做聖歸互耶和華,
27:23 祭司就著用你所估的價錢給伊推算到禧年。彼日,伊著提出你所估的價錢做聖,歸互耶和華。
27:24 禧年已經到,彼個地著歸賣主,就是彼個承接業的原主。
27:25 見若你所估的價銀攏著照聖所的舍客勒:二十季拉(kùi-la̍h)做一舍客勒(chi̍t-sià-khek-le̍k.)。
27:26 「獨獨精牲的中間頭水生的,無論是牛是羊,已經歸耶和華做頭水生的,人呣通閣分別伊做聖,因為這本是耶和華的。
27:27 若是無清氣的精牲所生的,就著照你所估的價加五份一來贖回伊;若呣贖回,就著照你所估的價來賣。
27:28 「獨獨一切永遠獻的,就是人對伊所有的永遠獻互耶和華,無論是人,是精牲,抑是伊產業的地,攏呣通賣,也呣通贖回。伊永遠獻的是至聖歸互耶和華。
27:29 見若永遠獻的就是對人的中間永遠獻攏呣通贖,伊的確著受死。」
27:30 「見若地上所有的,無論是土產抑是樹頂的果子,十份的一份是耶和華的,做聖歸互耶和華。
27:31 人若欲贖回此個十份一的甚麼物,就著加五份的一份。
27:32 見若牛群羊群的十份一,經過枴仔下的,每第十隻著做聖歸互耶和華。
27:33 無管伊是好歹,呣通對換;若欲對換,就所對換的及本然的精牲攏著做聖,贖得。」
27:34 這就是耶和華佇西奈山為著以色列人所命令摩西諸個命令。